ABŞ-nin bir neçə nüfuzlu şirkətinin rəhbəri Donald Trampın inaqurasiya tədbirlərinə rekord məbləğdə 239 milyon dollar ianə edib.
Oxu.Az TASS-a istinadən xəbər verir ki, bu barədə "Financial Times" qəzeti ABŞ Federal Seçki Komissiyasının məlumatlarına əsaslanaraq məlumat verib.
Qeyd olunur ki, bura texnologiya sektorundan olan "Apple", "OpenAI" və "Uber" kimi şirkətlər daxildir. Bu göstərici səkkiz il əvvəlkindən (2017-2021) iki dəfə çoxdur.
ABŞ-nin keçmiş prezidenti Cozef Bayden 2021-ci ildə təxminən dörd dəfə az - vəsait toplayıb. Trampın inaqurasiya komitəsi tərəfindən toplanan vəsait yeni prezidentin dəstəyini qazanmaq istəyən ABŞ sənayesinin bütün əsas sahələrindəki şirkətlərin nümayəndələrindən daxil olub. "JPMorgan Chase", "BlackRock", "Blackstone" və "Goldman Sachs" kimi maliyyə nəhəngləri hər biri bir milyon dollar ianə edib. "AT&T", "Comcast" və "Verizon" kimi telekommunikasiya şirkətləri də eyni məbləğdə ianə ediblər.
Bildirilir ki, "Chevron" şirkəti 2 milyon dollar ayırıb. Eyni məbləğdə vəsaiti ABŞ Milli Aeronavtika və Kosmik Tədqiqatlar İdarəsinin (NASA) rəhbəri, milyarder Cared Ayzekman təqdim edib.
Ən böyük ianə - 5 milyon dollar - toyuq əti istehsalçısı olan "Pilgrim's Pride" şirkəti həyata keçirib. Bununla yanaşı, "Ripple" kriptovalyuta şirkəti də təxminən eyni məbləğdə ianə edib.
