Vaşinqton Maduroya alternativ fiquru artıq müəyyənləşdirib
Venesuela ilə ABŞ arasında gərginlik pik həddə çatıb. ABŞ Venesuela sahillərinə yeddi hərbi gəmi, o cümlədən üç destroyer, bir sualtı qayıq və təxminən iki min dəniz piyadası göndərib. Rəsmi Vaşinqton əməliyyatı “narkotiklərlə mübarizə” adı altında təqdim etsə də, bəzi mənbələr əsl məqsədin Prezident Maduroya təzyiq göstərmək və ya onu aradan qaldırmaq olduğunu bildirir. Xüsusilə az əhalisi olan bölgələrdə narkotik istehsalı, habelə Rusiyanın tikdiyi yeni silah zavodları mümkün hədəf kimi göstərilir. Hətta bəzi iddialara görə, Maduro ABŞ tərəfindən terrorizmdə şübhəli bilinməsi səbəbindən pilotsuz uçuş aparatının hədəfinə çevrilə bilər. Venesuela Prezidenti Nikolas Maduro bildirib ki, ABŞ əsassız bəhanələrlə ölkəyə müdaxilə etməyə çalışır, məqsəd isə Venesuelanın təbii sərvətlərini ələ keçirmək və ölkənin müstəqil inkişafına mane olmaqdır.
Politoloq Turan Rzayev Sherg.az-a deyib ki, Tramp administrasiyası Venesuelaya qarşı sərt siyasət yürüdür və müxalifətə açıq şəkildə dəstək verir. Həmçinin, Maduro və ordusuna qarşı sanksiyalar tətbiq edir. Bununla belə, etiraf edilməlidir ki, Maduro da zəif fiqur deyil. Ekspert vurğulayıb ki, Maduro Rusiya və Çinlə sıx əlaqələrə malikdir və ABŞ üçün Latın Amerikasında risk daşıyan əsas liderlərdən biridir:
"Trampın bir tərəfdən Ermənistan-Azərbaycan danışıqları, digər tərəfdən Rusiya-Ukrayna münaqişəsində vasitəçilik, eləcə də İran-İsrail gərginliyindəki mövqeyini nəzərə alsaq, birdən-birə diqqətini Venesuelaya yönəltməsi “sağa baxıb, sola vurmaq” strategiyası kimi görünür. Doğrudur, atılan addımlar öncədən planlaşdırılır. Amma bu addımların beynəlxalq ictimaiyyətə və dünya siyasətinə ani və gözlənilməz şəkildə təqdim olunması ABŞ-nin xarici siyasətinin Tramp faktoru üzərindən qeyri-müəyyən görüntü almasına səbəb olur. Maduro bildirir ki, ABŞ Venesuelanın neftini, qazını, qızılını və digər təbii sərvətlərini pulsuz əldə etmək istəyir. Maduronun fikrincə, Venesuela yalnız təbii sərvətləri ilə yox, həm də anti-imperialist, yəni ABŞ təsirindən kənarda qalan müstəqil mövqeyi ilə seçilməlidir. Başqa sözlə, Maduro demək istəyir ki, “ABŞ sadəcə neft üçün gəlmir, onlar həm də ideoloji müstəqilliyimizə qarşı çıxırlar. İstəyirlər ki, biz boyun əyək, öz yolumuzdan dönək”.
T.Rzayev hesab edir ki, ABŞ ilkin mərhələdə Maduroya sadəcə təzyiq göstərmək istəyir:
"Kartellərlə mübarizə adı altında onun ən böyük gəlir mənbələri sıradan çıxarıla bilər. Bu da müxalifətin və rəqiblərinin əlini gücləndirər. Həmçinin, istisna deyil ki, Vaşinqton artıq Maduroya alternativ fiquru da müəyyənləşdirib. Amma bir məsələ dəqiqdir. Maduro Liviyanın devrilmiş lideri M.Qəddafinin taleyi ilə üzləşə bilər. ABŞ hərəkətə keçərsə, bəzi Latın Amerikası ölkələri, xüsusilə Kolumbiya bu prosesdə Vaşinqtona ilk dəstək verənlərdən olacaq".
