Vaşinqton Ukraynadakı münaqişənin həllinə dair çərçivə sazişini müzakirə etmək üçün ABŞ Prezidenti Donald Trampın xüsusi nümayəndəsi Stiven Uitkoffla Rusiya nümayəndələri arasında növbəti görüş təşkil etməyi planlaşdırır.
Oxu.Az xəbər verir ki, bu barədə CNN telekanalı mənbələrə istinadən məlumat verib.
Qeyd olunur ki, ABŞ Parisdə Avropa və Ukrayna nümayəndələri ilə danışıqlar zamanı çərçivə sazişini təqdim edib. Həmçinin, ABŞ-nin Krımı Rusiya ərazisi kimi tanımağa və cəbhə xəttində atəşkəs əldə etməyə hazır olduğu bildirilir.
Vaşinqton gələn həftə Londonda çərçivə sazişinin detalları üzərində işləməyə davam edəcəyinə ümid edir. Eyni zamanda, ABŞ Rusiya tərəfi ilə daha bir görüş planlaşdırır ki, bu görüş zamanı Uitkoff Moskvanı Vaşinqtonun planına qoşulmağa razı salmağa çalışacaq.
Xatırladaq ki, Rusiya prezidenti Vladimir Putinlə Uitkoff arasında sonuncu görüş aprelin 11-də baş tutub.
