Avropa İttifaqı (Aİ) Çexiyaya Rusiyadan neft idxalına verilmiş icazəni ləğv etmək qərarına gəlib. Bu barədə Aİ Şurasının Rusiyaya qarşı qəbul etdiyi 18-ci sanksiyalar paketi ilə bağlı açıqlamada bildirilir.
Trend xəbər verir ki, neft Praqaya “Drujba” boru kəməri ilə çatdırılırdı.
“Şura Çexiyanın Rusiyadan neft idxalına verilmiş icazəni ləğv etmək qərarına gəlib”, – deyə sənəddə qeyd olunub.
Yanvarın 15-də Çexiyanın Baş naziri Petr Fiala Rusiya neftindən tamamilə imtina etməyə hazır olduqlarını bildirmişdi. Əvvəllər respublika bu resursun 2024-cü ilə qədər tədarükünə dair Aİ sanksiyalarından istisna hüququ əldə etmişdi. Çexiyanın dövlət boru kəməri şirkətinin direktor müavini Zdenek Dundr vurğulamışdı ki, “istisna yalnız TAL neft kəmərinin ötürmə gücü artırılanadək qüvvədə qalacaq”.
2024-cü ildə Çexiyanın Rusiyanın “Drujba” kəməri ilə aldığı neftin payı 42 faiz təşkil edib.
“Drujba” boru kəməri 60 ildən də çox əvvəl - 1964-cü ilin oktyabrında fəaliyyətə başlayıb. Onun inşası ilə bağlı qərar 1958-ci ilin dekabrında Praqada İqtisadi Qarşılıqlı Əməkdaşlıq Şurasına üzv ölkələrin sessiyasında qəbul olunmuşdu.
İyulun 18-də Aİ Şurası Rusiyaya qarşı 18-ci sanksiyalar paketini təsdiqləyib. Bu sanksiyalar 22 Rusiya bankı, Rusiya Birbaşa İnvestisiya Fondu (RBİF) və onun törəmə şirkətləri ilə bütün əməliyyatları qadağan edir. Bundan əlavə, onlar həmçinin “Şimal axını” və digər sualtı boru kəmərlərindən bilavasitə və dolayı istifadəni də məhdudlaşdırır.
