"Terrorçusuz Türkiyə" prosesi fasiləsiz şəkildə davam edəcək. PKK-nın bütün strukturları silahı yerə qoymalı və məhv edilməlidir.
Teleqraf xəbər verir ki, bunu Ədalət və İnkişaf Partiyasının (AKP) sözçüsü Ömər Çelik partiyanın Ankarada keçirilən toplantısında çıxışı zamanı deyib.
Çelik Prezident Rəcəb Tayyib Ərdoğanın toplantı çərçivəsindəki çıxışının dünyada geniş rezonans doğurduğunu bildirib:
“Terror məsələsi sona çatmalıdır. Bu proses fasiləsiz şəkildə davam etməlidir. Terrorçusuz bir Türkiyə modeli həm də bölgə üçün nümunə olacaq. Silahların məhv edilməsi böyük əhəmiyyət daşıyır. PKK-nın bütün qolları silahı yerə qoymalı, fəaliyyətlərinə son verməlidirlər”.
Çelik qeyd edib ki, bu istiqamətdə parlamentdə yeni bir komissiya yaradılacaq və bu komissiya “Terrorçusuz Türkiyə” prosesində mühüm rol oynayacaq:
“Parlament bu prosesə müşahidəçi və rəhbərlik edən qurum kimi daxil olacaq. Prezidentimizin dövlət orqanlarına verdiyi göstərişlər çərçivəsində hər kəs öz yerində və vəzifəsinin başındadır”.
AKP sözçüsü həmçinin qeyd edib:
“Türk milliyyətçilərinin lideri Devlet Bahçelidir. Onun tarixi çağırışı ilə yeni bir dövr başladı. Dövlətimiz hüquq əsasında idarə olunur. Bu proses heç bir güzəşt və ya alver deyil. Dövlətimizin əsas prinsipləri müzakirə mövzusu ola bilməz. Bu günə qədər qazandığımız uğurlar şəhid və qazilərimizin fədakarlıqları nəticəsində əldə olunub. Türkiyə suverenliyini qorumağı bacarıb”.
