Almaniya müdafiə öhdəliklərini yerinə yetirəcək və rəqabət qabiliyyətini gücləndirməyə hazırdır.
Bu barədə Almaniyanın gələcək kansleri Fridrix Merz Berlində mətbuat konfransı zamanı bildirib.
Merz ABŞ Prezidenti Donald Trampa “Almaniya qayıtdı” mesajını çatdırıb. O, həmçinin AB-ni ABŞ-ın ticarət siyasətinə birgə cavab tapmağa çağırıb.
AĞ partiya sədrinin birinci müavini, politoloq Əhəd Məmmədli “Sherg.az”a söyləyib ki, İkinci Dünya savaşından sonra Almaniya və Yaponiyaya hücuma meyilli ordu qurmağa icazə verilmir:
“Hazırda Almaniya müəyyən addımlar atsa da, tam olaraq onlara hücumameyilli ordu yaratmağa icazə yoxdur. Almaniya İkinci Dünya müharibəsində sonra Amerikanın protektoratıdır. Yəni Amerikanın ən böyük hərbi bazası Almaniyada yerləşir. Almaniya, Yaponiya, Cənubi Koreya siyasi baxımdan Amerikadan asılıdır. Hər üç ölkə Amerikanın icazəsi olmadan müstəqil xarici siyasət apara və ordunu gücləndirə bilməzlər. Lakin gələcək zamanda Almaniya və Yaponiya keçmiş imperialist ənənələrinə qayıdaraq sözügedən prosesləri həyata keçirəcəklər. Amma qısa müddətdə baş tutması mümkün deyil. İndiki şəraitdə bütün Kontinental Avropanın, hətta Böyük Britaniyanın belə Amerikanın müdafiə çətirinə ehtiyacı var”.
