“ABŞ Prezidenti Donald Tramp nə vaxtsa Rusiya-Ukrayna müharibəsində nizamlanmanın mümkün olmadığına qərar verə bilər, amma o, hələlik müharibənin sona çatması üçün səylər göstərir”.
Bunu ABŞ Dövlət katibi Marko Rubio deyib.
“O, müharibəni bitirmək üçün mümkün olan hər şeyi etməyə çalışır. Avropadakı tərəfdaşlarımızla Ukrayna üçün təhlükəsizlik təminatları üzərində sıx işləyirik, çünki bu, danışıqlar yolu ilə həll üçün lazım olacaq. O, cəhdlərinə davam edəcək, bunun mümkün olduğuna inanır və buna nail olmaq istəyir. Nə vaxtsa prezident nizamlanmanın mümkün olmadığı qənaətinə gələ bilər. O, sadəcə bunun bitməsini istəyir”, - dövlət katibi bildirib.
Politoloq Zeynal Əmrəliyev Sherg.az-a bildirib ki, ABŞ Dövlət katibinin fikirlərindən görünür ki, Ağ Ev hələ də münaqişənin həllində vasitəçilik missiyasını davam etdirir:
"Sadəcə olaraq, Rubio açıq şəkildə bildirir ki, əgər Rusiya hansısa formada güzəştə getməzsə, ABŞ bu prosesdən çəkilə bilər. Burada iki əsas məqam diqqəti cəlb edir: Bir tərəfdən, Rubio Donald Trampın mövqeyini nəzərə alaraq çıxış edir və açıq şəkildə onun sözünü qorumağa çalışır. Digər tərəfdən isə reallıqlarla barışaraq, bundan sonra edilə biləcək addımların məhdud olduğunu vurğulayır. Bu, həm Rusiya, həm də Ukrayna üçün mesaj xarakteri daşıyır. Moskvaya ünvanlanan mesaj ondan ibarətdir ki, münaqişəni yalnız səhv yolla, yəni hərbi eskalasiya ilə dayandırmaq olar. ABŞ isə Rusiyanın maraqlarını nəzərə almaqla, münaqişənin qarşısını diplomatik şəkildə bitirmək və ağırlaşdırılmış sanksiyaların tətbiqini müəyyən qədər gecikdirmək üçün vasitəçilik edə bilər. Hazırda Tramp administrasiyası da məhz bu xətti davam etdirir: nə özü sərt sanksiyalar tətbiq edir, nə də Avropa Birliyinə buna imkan verir.
Eyni zamanda bu, o deməkdir ki, əgər Kreml münaqişəni davam etdirərsə, Vaşinqton artıq vasitəçilikdən çəkiləcək. O zaman ağır sanksiyalar paketi işə düşəcək, Rusiyaya əlavə təzyiqlər artacaq. Paralel olaraq Ukraynaya silah təminatı genişləndirilə, Avropa ölkələri və ABŞ bu siyasəti daha fəal şəkildə davam etdirə bilər".
Amalitik əlavə edib ki, Rubionun sözləri Ukrayna rəhbərliyinə də bir mesajdır:
"O, bildirir ki, ABŞ hələlik vasitəçilik missiyasını davam etdirməyə hazırdır, lakin əgər Kiyev anlaşmaya getməsə, bu, olduqca çətin və təhlükəli bir prosesin başlanğıcı olacaq. Beləliklə, dövlət katibinin açıqlamaları həm Moskvaya, həm də Kiyevə ünvanlanmış xəbərdarlıq xarakteri daşıyır".
