Mübariz Göyüşlü: Kalinyakın etirafı regionda sabitlik üçün əhəmiyyətlidir
Slovakiyanın müdafiə naziri Robert Kalinyak bu ilin fevral və mart aylarında verdiyi müsahibələrində iki dəfə Ermənistanın Azərbaycan ərazilərini işğal etdiyini bildirib.
Bu barədə erməni mediası yazıb.
Xatırladılıb ki, fevral ayında yerli TA3 telekanalına müsahibəsində R.Kalinyak Qarabağa istinad edərək, Ermənistanın Azərbaycan ərazisini uzun illər işğalda saxladığını bildirib. Müsahibə fevralın 21-də Smer-SD partiyasının və Kalinyakın rəsmi Feysbuk səhifələrində yerləşdirilib.
Qeyd edilib ki, rəsmi İrəvan bu həqiqəti təkzib etməyə çalışmayıb.
Cross Media Təhlil Mərkəzinin analitiki, siyasi şərhçi Mübariz Göyüşlü "Sherg.az"a deyib ki, Ermənistanın Azərbaycanın ərazilərini işğal etməsi danılmaz bir faktdır:
"Slovakiyanın müdafiə nazirinin bu reallığı – yəni Ermənistanın Azərbaycan torpaqlarını uzun illər ərzində işğal altında saxlamasını etiraf etməsi, beynəlxalq səviyyədə həqiqətlərin qəbul edilməsi baxımından müsbət bir hadisədir. İndiyə qədər bu məsələ əsasən Azərbaycan və onun yaxın tərəfdaşları tərəfindən gündəmə gətirilirdi. Bu gün isə artıq Avropa tribunasından da bu cür fikirlərin səsləndirilməsi, həqiqətlərin beynəlxalq ictimaiyyət tərəfindən tanınması üçün əhəmiyyətli bir mərhələ sayılır. Digər tərəfdən, Ermənistanın baş naziri Paşinyan da daxil olmaqla, erməni siyasətçiləri və media təmsilçiləri bu və ya digər şəkildə həqiqətləri etiraf etməyə məcbur qalırlar. Bu isə onların cəmiyyətini reallıqlarla barışdırmaq və daxili auditoriyanı mövcud vəziyyətlə üz-üzə qoymaq cəhdlərindən irəli gəlir. Nəticə etibarilə, həm regionda sabitliyin təmin olunması, həm də Ermənistanın daxili ictimai fikrinin dəyişməsi üçün bu etirafların mühüm təsiri var".
