Böyük Britaniya, Fransa və Ukraynanın müdafiə nazirləri Ukrayna münaqişəsinin həllini müzakirə etmək üçün yaxın günlərdə görüşəcəklər.
Bu barədə Britaniya hökuməti məlumat yayıb.
"Baş nazir əlavə edib ki, yaxın günlərdə Böyük Britaniya, Fransa və Ukrayna hərbi liderlərinin görüşü baş tutacaq.", - Britaniya hökumətinin saytında yazılıb.
Qeyd edək ki məlumat Böyük Britaniyanın baş naziri Key Starmer və Ukrayna prezidenti Volodimir Zelenski arasında telefon danışığından sonra yayılıb.
Politoloq Əhəd Məmmədli "Sherg.az"a deyib ki, Böyük Britaniya və Fransa hərbi liderləri baş tutacaq görüş vasitəsilə ictimaiyyətə açıq mesaj verməyə çalışırlar:
"Onlar bildirmək istəyir ki, "Biz Ukraynanın yanındayıq". Bu, Avropanın Ukraynaya dəstək nümayiş etdirmək cəhdidir. Lakin reallıqda Avropa, nə qədər istəsə də, Ukraynaya kifayət qədər hərbi yardım göstərə bilmir. Bunun əsas səbəbi isə Avropanın hərbi baxımdan Rusiyaya uduzmasıdır.
Hazırda Rusiya, Qərb dünyasında hərbi texnika istehsalı baxımından yalnız ABŞ-dən geri qalır. Bu, Moskvanın müharibə resurslarını davamlı şəkildə yeniləyə bilməsinə və uzunmüddətli hərbi əməliyyatları davam etdirməsinə imkan yaradır. Dünya ictimaiyyətində belə bir fikir formalaşıb ki, Avropa Ukraynanı tək qoymayıb və ona dəstək göstərir. Lakin əgər bu doğrudursa belə, real mənzərəni dəyişə biləcəkmi?
Kiyevin mövcud vəziyyətdən çıxış yolu ya ABŞ-la razılaşmaqdır, ya da müharibənin nəticələrini qəbul etməkdir. Ancaq Vaşinqtonun şərtləri olduqca sərtdir – o, Ukraynanın bütün təbii sərvətlərini nəzarətə götürmək istəyir. Son hadisələr isə Ukraynanın artan beynəlxalq təzyiqlər altında məhz bu istiqamətə doğru yönəldiyini göstərir".
