Elçin Xalidbəyli: AB-nin ayırdığı maliyyə vəsaitinin bir hissəsi Böyük Britaniyadan silah alınmasına yönəldiləcək
Böyük Britaniya Baş naziri Keyr Starmer AB ilə böyük ticarət razılaşmasına yaxındır.
Bu barədə “Tayms” məlumat yayıb.
Məlumata görə, müqavilə Britaniya silah şirkətlərinə avropalı müttəfiqlərə milyardlarla funt-sterlinq dəyərində silah satmağa imkan verəcək:
“Bu, Londonun balıqçılıq hüququ məsələsində Brüsselə əhəmiyyətli güzəştlərindən sonra mümkün olub”.
Politoloq Elçin Xalidbəyli "Sherg.az"a deyib ki, Ticarət razılaşması həm AB, həm də Böyük Britaniyanın maraqları çərçivəsindədir:
"Xüsusilə Böyük Britaniya bu anlaşmadan qazanclı çıxacaq tərəf kimi görünür. Çünki AB hərbi xərclərə 800 milyard avro vəsait ayırıb. Həmçinin AB-də Rusiya xofu mövcuddur. Bunun ucbatından Avropa ölkələri yaxın 3-5 il ərzində hərbi xərcləri artırmaq və ordularını gücləndirmək üçün böyük maliyyə vəsaitləri ayırmağa başlayıblar. Bu məbləğ də bir çoxlarının, yəni silah ticarəti ilə məşğul olan dövlətlərin iştahını qabardır. Xüsusilə də Fransa AB-nin üzvü olsa da, 800 milyardlıq hərbi məqsədlərə yönəlik vəsaitin məhz öz şirkətlərinin istehsal etdiyi hərbi texnikanın alınmasına xərclənməsinə cəhd göstərir".
Politoloq vurğulayıb ki, AB ölkələrinin bir çoxu Fransa silahlarının effektiv olmadığını düşündüyü üçün başqa dövlətlərdən, o cümlədən Türkiyədən də əsasən pua tipli ilahların alınmasında maraqlıdır:
"Böyük Britaniyanın da bu istiqamətdə önə çıxması qətiyyən təəccübləndirici deyil. Bu ölkənin hərbi texnikası kifayət qədər effektiv və nüfuzlu silah növlərinə aiddir. AB üzvləri də Böyük Britaniya silahları əldə etməkdə tamamilə maraqlıdırlar. AB-nin ayırdığı maliyyə vəsaitinin bir hissəsi Böyük Britaniyadan silah alınmasına yönəldiləcək. Nəticədə bu ölkənin silah şirkətləri geniş qazanclar əldə edəcək".
