Braziliya Federal Polisi bu gün sabiq Prezident Jair Bolsonarunun iqamətgahında və onun başçılıq etdiyi Liberal Partiyanın qərargahında axtarışlar aparıb.
Bu barədə “Report” CNN-ə istinadən məlumat verir.
Mənbə bildirir ki, axtarış zamanı polis əməkdaşları müəyyən edilməmiş məbləğdə ABŞ dolları müsadirə edib, Bolsonarunun elektron qolbaq taxması və xarici rəsmilərlə ünsiyyət qurmaması ilə bağlı qərar qəbul edilib.
Bolsonaru 2022-ci ildə keçirilmiş prezident seçkilərinin nəticələrini ləğv etmək məqsədilə sui-qəsd təşkil etməkdə ittiham olunub. Əgər sabiq prezidentin təqsiri sübuta yetirilərsə, o, 40 ilədək azadlıqdan məhrum edilə bilər. Bolsonaru təqsirini inkar edir.
Axtarışlar ABŞ Prezidenti Donald Trampın braziliyalı həmkarı Luis İnasiu Lula da Silvanı keçmiş prezidentə qarşı cinayət prosesini dayandırmağa çağırdığı və yüksək rüsumlar tətbiq etməklə hədələdiyi bir vaxtda baş tutub.
