Türkiyənin Milliyətçi Hərəkat Partiyasının (MHP) lideri Dövlət Baxçalı Ankarada DEM Partiya heyəti ilə görüşüb.
APA NTV-yə istinadən xəbər verir ki, görüş 40 dəqiqə davam edib.
DEM Partiyasının Van millət vəkili Pervin Buldan görüş üçün Dövlət Baxçalıya təşəkkür edib.
Qeyd edək ki, Türkiyə dövlət başçısı Rəcəb Tayyib Ərdoğan da DEM Partiya rəhbərləri ilə bir neçə dəfə görüşüb. DEM Partiyasının rəhbərliyi İmralı adasında PKK lideri Abdullah Öcalanla danışıqlar aparıb.
Xatırladaq ki, bir müddət əvvəl PKK terror təşkilatının həbsdəki lideri Abdullah Öcalan tərəfdarlarına çağırış edib. Öcalanın adından yayılan yazılı müraciətdə “Silahı yerə qoyun!” çağırışı yer alıb. PKK liderinin çağırışından sonra bir qrup təşkilat üzvü Süleymaniyyədə tərksilah olub.
PKK lideri Abdullah Öcalan 26 ildir İmralı həbsxanasında saxlanılır. O, 1999-cu il fevralında Milli Kəşfiyyat Təşkilatının əməliyyatı nəticəsində Keniyada saxlanılıb və Türkiyəyə gətirilib. O, ölüm cəzasına məhkum edilsə də, hökm sonradan ömürlük həbs cəzası ilə əvəzlənib.
