"İsrail İranın nüvə proqramı məsələsini diplomatik yolla həll etməyə hazırdır".
Teleqraf xəbər verir ki, bu barədə İsrailin xarici işlər naziri Gideon Saar "The Telegraph" qəzetinə verdiyi müsahibəsində bildirib.
Nazir "The New York Times" qəzetinin İsrailin may ayında İrana hərbi hücum etməyi planlaşdırması ilə bağlı yaydığı məlumatı təkzib edib. Saar vurğulayıb ki, təhlükəsizlik kabinetinin üzvü kimi belə bir qərarın mövcud olmadığını dəqiq bilir.
“İsrailin əsas məqsədi İrana nüvə silahı əldə etməyə imkan verməməkdir. Əgər bu hədəfə diplomatik yolla çatmaq mümkündürsə, bu, qəbul edilə bilər”, – deyə Saar qeyd edib.
O, həmçinin bildirib ki, İsrail bu məsələ ilə bağlı ABŞ və Avropa ölkələri ilə daimi əlaqə saxlayır.
Xatırladaq ki, daha əvvəl Oman Xarici İşlər Nazirliyi Romada keçirilən danışıqlardan sonra açıqlama yayaraq ABŞ və İranın dinc nüvə enerjisinin qorunması və inkişafı ilə bağlı danışıqlar apardığını bildirmişdi. Qeyd olunub ki, mümkün razılaşma İranın dinc məqsədlərlə nüvə enerjisini inkişaf etdirməsinə imkan verəcək.
