İsrail rəhbərliyi ehtimal edir ki, iyunun 22-də ABŞ Hərbi Hava Qüvvələrinin zərbələrindən sonra İranın nüvə obyektlərində dağıntılar altında qalan zənginləşdirilmiş uran ehtiyatları məhv edilməyib və İran hökuməti onları çıxarmağa qadirdir.
Oxu.Az xəbər verir ki, bu barədə məlumatı "Associated Press" yüksək rütbəli israilli məmura istinadla yayıb.
Ehtiyatların əsas hissəsinin İsfahan şəhərində yeraltı üçüncü səviyyədə yerləşdiyi bildirilir. İsrail hesab edir ki, İran bu materiallara texniki baxımdan çıxış əldə edə bilər, baxmayaraq ki, bu, çətin və resurs tutumlu bir proses olacaq.
BAEA-nın baş direktoru Rafael Qrossi daha əvvəl bildirmişdi ki, İran nüvə proqramının bəzi elementlərini saxlayıb və bir neçə ay ərzində uranın zənginləşdirilməsinə yenidən başlaya bilər. Onun sözlərinə görə, Fordo, Natanz və İsfahan obyektlərində uranın işlənməsi və çevrilməsi üzrə müəyyən imkanlar "böyük ölçüdə dağıdılsa da", tamamilə məhv edilməyib.
