Aprelin 10-da Rusiya ilə ABŞ arasında İstanbulda qapalı görüş keçirilib. Yerli vaxtla saat 10:00-da başlayan görüş 5 saatdan çox davam edib. Tərəflər Rusiya və ABŞ nümayəndə heyətləri arasında səfirlik fəaliyyətinin bərpası və diplomatik əlaqələrin normallaşdırılmasını müzakirə ediblər. Görüş Rusiyanın İstanbuldakı Baş konsulluğunda keçirilib.
Siyasi təhlilçi Aqşin Kərimov Sherg.az-a deyib ki, ABŞ və Rusiya nümayəndələrinin İstanbulda keçirilən danışıqları ikitərəfli diplomatik-siyasi əlaqələrin nizamlanması ilə əlaqədar məsələləri əhatə edir. Ekspert bildirib ki, ABŞ ilə Rusiyanın müzakirə predmetində Ukrayna mövzusu da prioritet təşkil edə bilərdi:
“Daha doğrusu informasiyalar bu istiqamətdədir, bununla belə ABŞ-Rusiya əlaqələrindəki qarşılıqlı hörmətə əsaslanan sistemin bərpası Ukraynadakı münaqişənin nəticələrindən asılıdır.
Moskva ilə Vaşinqtonun Ukraynadakı müharibənin tənzimlənməsini asanlaşdırmaq üçün birgə səy göstərdikləri artıq sirr deyil, bu isə Kiyevin milli və təhlükəsizlik maraqları ilə ziddiyyət təşkil edir”,-deyə o əlavə edib.
Onun sözlərinə görə, Ukraynada narahatlıq var ki, Rusiya ABŞ ilə danışıqlara müharibədəki gələcək hücum səylərini gücləndirmək vasitəsi kimi baxır. A.Kərimov məsələyə ABŞ ilə Çin arasındakı gərginlik kontekstində yanaşaraq deyib:
“ABŞ-nin Donald Trampın administrasiyası dövründəki Ukrayna ilə əlaqədar fərqli yanaşmaları, Vaşinqtonun resurslarını Çinlə tarif müharibələrinə yönləndirməsi Kiyevdən diqqəti yayındırır. Ukrayna Rusiya ilə ABŞ danışıqları, Ağ Evlə Çin arasındakı ticarət savaşına görə öz mövqelərinin beynəlxalq aləmdə sıfıra düşməsini arzulamır”.
Siyasi şərhçinin fikrincə, Ukraynanın nəzərləri öz üzərinə çəkərək yenidən bir nömrəli beynəlxalq prioritet olması üçün o, döyüş meydanında ciddi nəticələr əldə etməlidir:
“Bu, hələlik baş vermir, əksinə Ukraynanın ərazi itkiləri getdikcə çoxalır. Bir məsələni də nəzərdə saxlamaq lazımdır ki, Rusiyanın da hücum tempi son 5 ayda yüksək intensivliyini azaldıb. Belə bir məqamda Ukrayna üçün güclü əks-hücum əməliyyatları keçirmək şansı yaransa da, ABŞ-nin yardımlara və Kiyev üçün tərtib etdiyi kəşfiyyat məlumatlarına əhəmiyyətli məhdudiyyətlər qoyması Kiyevin əlini-qolunu bağlayır.
Bu baxımdan Ukraynanın taleyini birbaşa olaraq ABŞ-Rusiya danışıqları deyil, müharibə meydanındakı əməliyyat şəraiti müəyyənləşdirir. Ukraynanın müqavimət gücü hara qədər olacaq – bunun hesabını indidən təqdim etmək çətindir”.
