Rusiya-Ukrayna müharibəsi hələ də şiddətli qarşıdurmalarla davam edir. Ukrayna ordusu Qərbin dəstəyi ilə müdafiə mövqelərini qorumağa çalışır, lakin Rusiya qüvvələri bəzi strateji məntəqələrdə irəliləyiş əldə edib. Diplomatik cəbhədə isə vəziyyət mürəkkəb olaraq qalır. Rusiya Prezidenti Vladimir Putin müəyyən şərtlərlə sülh danışıqlarına açıq olduğunu bildirsə də, Ukrayna və onun müttəfiqləri bu şərtləri ilə razılaşmır. Eyni zamanda, müharibənin uzanması enerji bazarına və qlobal iqtisadiyyata mənfi təsir göstərməkdə davam edir. Münaqişənin nə vaxt və hansı şərtlərlə başa çatacağı hələ də qeyri-müəyyənliyini qoruyur. Siyasi analitiklər hesab edirlər ki, prosesin uğurla nəticələnməsi üçün yeni vasitəçilik formatlarına ehtiyac var. Müharibənin gələcək taleyi isə daha çox qlobal güclərin atacağı addımlardan asılı olacaq.
Politoloq Elxan Şahinoğlu "Sherg.az"a bildirib ki, Rusiya Prezidenti Vladimir Putin sözdə Trampın sülh təkliflərinə razılaşsa da, əməldə bunun tərsini nümayiş etdirir:
"Əslində Ağ Evin sahibi neçə həftədir ki, Rusiya və Ukrayna arasında ən azı 30 günlük atəşkəsin əldə olunmasını istəyir. Volodimir Zelenski Trampın təklifi ilə razıdır. Lakin Putin atəşkəsin əleyhinə olmadığını bildirsə də, öz şərtlərindən çəkinmir. Kremlin rəhbərinin ortaya qoyduğu tələblər sülhün imzalanmasına imkan vermir. Putin tələb edir ki, Ukraynanın referendumla Rusiyaya birləşdirilən 4 bölgəsi onun ölkəsinə məxsus olsun. Eyni zamanda bu əraziyə beynəlxalq müşahidəçilər yerləşdirilməsin. Putin bu kimi tələbləri irəli sürdüyü üçün də atəşkəsə nail olmaq mümkün deyil. Digər tərəfdən Rusiya Prezidenti Trampla da münasibətləri korlamaq niyyətində deyil. Ona görə də Ağ Evin sahibinin ünvanına xoş sözlər bildirir. Amma o bütün bunları deyərkən Ukrayna ilə münaqişənin həlli yolunda sülhün əldə edilməsi üçün real addımlar da atmır".
