Ukrayna hələ də enerji obyektlərinə hücumlara moratoriuma qoşulmayıb.
APA-nın Moskva müxbiri xəbər verir ki, bunu Rusiya prezidentinin mətbuat katibi Dmitri Peskov deyib.
Onun sözlərinə görə, Ukraynanın enerji obyektlərinə zərbələrə qoyulan moratorium qüvvədə qalır və Rusiya buna əməl edir.
"Əslində, Kiyevin bu moratoriuma qoşulmaması davam edir. Artıq qeyd edildiyi kimi, biz bu vəziyyəti amerikalıların diqqətinə çatdırırıq. Bəli, Rusiya tərəfi bu moratoriuma əməl etməkdə davam edir”, - Kremlin sözçüsü vurğulayıb.
Peskov əlavə edib ki, Rusiya prezidenti Vladimir Putin Ukraynadakı vəziyyəti sülh yolu ilə həll etməyə hazırdır, lakin Kiyev bu yolla getmək istəmir: "Prezident Putin dinc danışıqlara, Ukraynadakı vəziyyəti siyasi və diplomatik üsullarla həll yollarının tapılmasına açıq qalır. Rusiyanın Amerika tərəfi ilə razılaşaraq, enerji infrastrukturu obyektlərinə hücumlara müvəqqəti moratoriuma qoşulduğunu bəyan etməsi bunun ən bariz sübutudur".
Kremlin rəsmisi Ukraynanın eyni yolla getmək istəmədiyinin göründüyünü söyləyib.
