Fransanın “Milli Birlik” Partiyasının parlament fraksiyasının lideri Marin Le Pen məhkəmənin onun seçkilərdə iştirakına qadağa qoyması qərarını siyasi adlandırıb. O bu haqda TF1 telekanalında açıqlaması zamanı danışıb.
"Bu, siyasi qərardır", - deyən Le Penə görə qəbul edilən qərarla qanunun aliliyi prinsipləri tamamilə pozulub.
O bildirib ki, ökm, Avropa İnsan Hüquqları Konvensiyasının tələb etdiyi kimi, effektiv apellyasiya şikayətinə imkan vermir.
Beynəlxalq məsələlər üzrə ekspert Əziz Əlibəyli "Sherg.az"a bildirib ki, Donald Trampın hakimiyyətə gəlişindən və izlədiyi siyasi xətdən sonra onun dünyadakı tərəfdaşlarının ölkələrində bu cür proseslərin baş verməsi gözlənilən idi:
“Məsələn, Le Pen ifrat sağçıların lideridir və Makronun əsas rəqibi sayılır. Onunla bağlı mənimsəmə iddiaları qaldırılıb. Söhbət 4-5 milyon yevronun mənimsənilməsindən gedir ki, bu da siyasi baxımdan Avropa İttifaqı səhmlərinə aiddir. Maraqlı məqam isə Le Pen daxil olmaqla bütövlükdə həmin camiyənin proses ortaya çıxan kimi siyasi məqsədli olmasını demələridir. Məhkəmənin çıxardığı hökmə əsasən onun həbs olunması seçkilərdəki namizədliyini əngəlləyir. Məsələnin digər tərəfi isə Trampın bildirdiyi kimi seçkilərə ciddi təsir göstərəcəyi ilə əlaqəlidir. Yəni mövcud durum antidemokratik olmaqla yanaşı həm də Fransada Le Pen tərəfdarlarını səfərbər etməklə siyasi sabitliyə zərbə vuran prosesləri başladacaq. Qarşıda mitinqlər, polislərlə qarşıdurmalar və qanlı toqquşmalar gözlənilir”.
