ABŞ Prezidenti Donald Tramp bəyan edib ki, Ukraynaya göndərilən Amerika silahlarının maliyyə yükünü NATO müttəfiqləri üzərinə götürəcək.
O, bu barədə "NBC News" telekanalına verdiyi müsahibədə bildirib.
ABŞ lideri əlavə edib ki, bu razılaşma ötən ay keçirilən NATO sammitində əldə olunub.
Beynəlxalq məsələlər üzrə ekspert Əziz Əlibəyli Sherg.az-a deyib ki, əslində, ABŞ uzun müddət təzyiqlər artdıqca Rusiyanın razılaşmaya gedəcəyinə ümid edirdi:
"Hətta Ukrayna ilə ABŞ arasında müəyyən şou xarakterli gedişlər də qurulmuşdu – prezidentlər arasında söz atışmaları və bəyanatlar verildi. Amma reallıq göstərdi ki, Rusiya, Trampın düşündüyü kimi, asanlıqla güzəştə getmək niyyətində deyil.
ABŞ və Rusiya resurslar müharibəsinə ümid bağlayır, amma bu prosesin nə qədər davam edəcəyi sual altındadır və olduqca vacib məsələdir. Artıq ötən ay və bu ayın əvvəlində baş verən hadisələr göstərdi ki, əvvəlcə ABŞ Ukraynaya silah yardımını azaldıb, sonra isə yenidən bərpa edib. Putin və Tramp arasında aparılan danışıqlardan sonra isə ABŞ-ın mövqeyində müəyyən dəyişikliklər müşahidə olundu".
Analitikin fikrincə, artıq bu qərarlar onu göstərir ki, təkcə ABŞ faktoru ilə kifayətlənmək olmaz:
"NATO daha rəsmi şəkildə Ukraynaya ciddi dəstək verməyə başlayır. Bu isə daha çox informasiya müstəvisində Rusiyaya ünvanlanan mesajdır: əgər müharibə yeni mərhələyə keçəcəksə – ki, keçid artıq hiss olunmaqdadır – onda Rusiya bu resurslar savaşında nə qədər davam gətirə biləcək"?
