İsveç, Finlandiya, Danimarka və Norveç ABŞ-a olan asılılığı azaltmaq məqsədilə təhlükəsizlik sahəsində əməkdaşlığı gücləndirir.
Globalinfo.az xəbər verir ki, bu barədə “The Wall Street Journal” qəzeti ekspertlərə istinadla məlumat yayıb.
Məlumata görə, Şimali Avropanın dörd əsas dövləti – İsveç, Finlandiya, Danimarka və Norveç – yeni təhlükəsizlik modelini qurur. İsveç sualtı qayıqlar, tanklar və səsdən sürətli qırıcılar istehsal edir, Norveç isə Arktikada dəniz müşahidəsi və döyüş əməliyyatları imkanları təqdim edir. Finlandiya Avropanın ən böyük daimi ordusuna və artilleriyasına malikdir, Danimarka isə Əfqanıstan və İraqda təcrübə qazanmış xüsusi təyinatlı qüvvələrə sahibdir.
Ekspertlər bu cür regional ittifaqın hərbi-sənaye baza yaratmaq üçün kifayət qədər iqtisadi və resurs potensialına malik olduğunu düşünür. Bundan başqa, onlar bu bloku NATO-nun uğursuz olması halında ehtiyat plan kimi qiymətləndirirlər.
Qeyd edək ki, 2023-cü ildə bu ölkələr hava qüvvələrini birləşdirərək ortaq Hərbi Hava Qüvvələri komandanlığı yaratmışdı. 2024-cü ildə isə onlar Şimal Müdafiə Əməkdaşlığı çərçivəsində 2030-cu ilə qədər birgə müdafiə konsepsiyasını hazırlayıblar.
