Özbəkistanda Ali Məclisin Senatı 14 yaşdan kiçik uşaqlara qarşı seksual cinayətlərə görə cəzaları sərtləşdirən qanunu təsdiqləyib.
Teleqraf xəbər verir ki, 14 yaşına çatmamış uşağın zorlanmasına, uşaqlara qarşı zor tətbiq edilərək qeyri-təbii formada cinsi tələbatın ödənilməsinə görə qanun 25 ilədək müddətə azadlıqdan məhrumetmə və ya ömürlük həbs cəzası müəyyən edir.
Uşaqların cinsi toxunulmazlığına qarşı xüsusilə ağır cinayətlər üzrə cinayət məsuliyyətinə cəlbetmə və hökmün icra müddətinə dair iddia müddətləri artıq tətbiq olunmur. Əgər cinayət uşağın ölümü ilə nəticələnibsə, məhkəmə şərti cəza təyin edə və ya şərti olaraq vaxtından əvvəl azadetmə tətbiq edə bilməyəcək.
Zərərçəkmiş yetkinlik yaşına çatmayanlara ilk prosessual hərəkətdən etibarən dövlət tərəfindən pulsuz ixtisaslı hüquqi yardım göstəriləcək. Zorakılığa məruz qalmış uşağın dindirilməsi artıq məcburi olaraq videoya çəkiləcək. Zərərçəkmişlə şübhəli şəxsin üzləşdirilməsi yalnız müstəntiqin, prokurorun və ya məhkəmənin qərarı ilə keçiriləcək. Zorakılığı ailə üzvü və ya yaxın qohum törədibsə, prosessual hərəkətlərdə qəyyumluq və himayə orqanının nümayəndəsinin iştirakı məcburi olacaq.
İşəgötürən təhsil müəssisəsinin əməkdaşını uşaqlara qarşı zorakılığa görə məsuliyyətə cəlb edildiyi halda işdən çıxarmaq hüququ əldə edib.
Vəzifələrin lazımi qaydada yerinə yetirilməməsinə görə inzibati məsuliyyət də sərtləşdirilib: qayğı göstərməməyə, uşağın əsas ehtiyaclarının qəsdən təmin edilməməsinə, nikah yaşının pozulmasına, uşaqların zərərli məlumatlardan qorunması üçün tədbirlər görülməməsinə görə məsuliyyət müəyyən edilib. Bundan əlavə, təqib və ya zorakılıqdan zərər çəkmiş qadınların və uşaqların xahişi ilə dövlət orqanları onların yaşayış ünvanına yazılı və ya elektron cavab göndərməyə bilər, bu, onların məxfiliyinin qorunmasına xidmət edəcək.
Qərar Namanqan vilayətində uşaq bağçasında beş yaşlı qıza qarşı seksual zorakılıq faktı üzrə cinayət işi başlanması fonunda qəbul edilib. Yerli KİV-in məlumatına görə, şübhəli şəxs uşaq bağçasının anbar müdiri olub. O, həbs edilib.
Özbəkistan Prezident Administrasiyasının rəhbəri Səida Mirziyoyeva bundan əvvəl pedofillər üçün ölüm cəzasının tətbiqi təklifini vermişdi.
