Ermənistanda məhkəmə baş nazirin kortejindəki avtomobilin sürücüsünü qadını vurmaqda təqsirli bilib
Ermənistan məhkəməsi 2022-ci ildə Baş nazir Nikol Paşinyanın kortejindəki avtomobilin sükanı arxasında olarkən hamilə qadını vuran sürücü Aram Navasardyanı təqsirli hesab edib.
Bakupost.az Ermənistan mediasına istinadən xəbər verir ki, sürücü nəqliyyat vasitələrinin istismar qaydalarını pozaraq ehtiyatsızlıq üzündən insanın ölümünə səbəb olmaqda təqsirli bilinib.
Həlak olan qadının ailəsinin vəkili Raffi Aslanyan bildirib ki, sürücünün təqsiri məsələsi həll olunub, cəza məsələsinə isə əlavə dinləmələr mərhələsində baxılacaq. Hüquqşünas əlavə edib ki, zərərçəkmiş tərəf qərardan razıdır, çünki onların dəlilləri məhkəmə tərəfindən nəzərə alınıb.
"Hadisə baş verən zaman köhnə Cinayət Məcəlləsi qüvvədə idi, buna görə də Navasardyanı beş ilədək həbs cəzası gözləyirdi. Yeni Cinayət Məcəlləsinə əsasən, ona qarşı irəli sürülən ittiham 2 ildən 5 ilədək həbs cəzasını nəzərdə tutur. Lakin yeni məcəllənin sərtləşdirildiyini nəzərə alaraq, köhnə məcəllə tətbiq ediləcək və cəza o qədər də sərt olmaya bilər", - Aslanyan izah edib.
Xatırladaq ki, 2022-ci il aprelin 26-da Navasardyan idarə etdiyi avtomobillə qadını vuraraq hadisə yerindən qaçıb. Lakin iki saat sonra geri qayıdıb və istintaq hərəkətlərində iştirak edib.
