Biz çox açıq şəkildə deyirik ki, İran və Hizbullahla müharibə etmək istəyirik. Hələ başa düşmürsüz?
Bu sözləri israilli jurnalist Eddi Kohen X hesabında yazıb.
Mövzu ilə bağlı “Sherg.az”a danışan Orta Doğu Araşdırmalar Mərkəzinin rəhbəri, siyasi şərhçi bildirib ki, İsrail hakimiyyəti və onun hərbi rəsmiləri açıq şəkildə baş verən hadisələri beynəlxalq ictimaiyyətin diqqətinə çatdırırlar:
“İsrail baş naziri Benyamin Netanyahu bəyan edir ki, HƏMAS və digər radikal silahlı qruplaşmalar Fələstin bölgəsində neytrallaşana qədər mübarizəni davam etdirəcəklər. HƏMAS-ı isə Hizbullah və Husilər kimi İran hakimiyyətinin dəstəklədiyi də hər kəsə məlumdur. Yəni, İran HƏMAS çətiri altında İsraillə müharibə aparır. Bu müharibənin uzantıları Suriyaya da gəlib çıxır. Dəməşqdə İranın konsulluğu kimi təqdim olunan ərazidə SEPAH-ın yüksək rütbəli zabitləri və general Məhəmməd Rza Zahidinin ölümü həmin silahlı qarşıdurmanın davamıdır. Atəşkəs rejiminin əldə edilməsi müharibənin başlamasına səbəb olan İranın yaratdığı qrupların yenidən regionda qalması deməkdir. Məsələn, İsrail HƏMAS ilə sülhə nail olmağı özünə sığışdırmır. Ona görə də çıxış edirlər ki, HƏMAS-ın əli insanların qanına batıb, onlarla sülh danışıqları mümkünsüzdür. Eyni zamanda HƏMAS regionda İsrail və ABŞ maraqlarının reallaşmasına qarşı olan güclərin təmsilçisidir. İsrail isə perspektivdə təhlükəsizliyinin təmin olunması üçün Fələstin ərasizində bu tip silahlı qruplaşmaların fəaliyyət göstərməsini istəmir”.
Ekspert qeyd edib ki, sülhün əldə edilməsi üçün ilk növbədə HƏMAS və İranın dəstəklədiyi digər qüvvələr regionda ya fəaliyyətlərini dayandırmalı, ya da zərərsizləşdirilməlidirlər:
“Əksi olan halda sülh deyil, müvəffəqəti atəşkəs ola bilər. Müharibə daha çox Fələstin ərazisində gedir və öz yurd-yuvalarından didərgin düşən də Fələstin ərəbləridir. İran da ərəblərdən özünə qalxan kimi istifadə edərək İsrailə qarşı savaş aparır”.
Xatırladaq ki, aprelin 1-i axşam saatlarında İsrail Hərbi Hava Qüvvələri İranın Dəməşqdəki konsulluğunun binasına hücum edib. Hücum nəticəsində bina tamamilə dağılıb, İranın yüksək rütbəli 7 zabiti həyatını itirib. İranlı diplomatlarında öldüyü bildirilir.
