Rusiya Prezidenti Vladimir Putin yatmazdan əvvəl işığı söndürmək vərdişindən əl çəkmədiyini bildirib.
Teleqraf xəbər verir ki, bu barədə o, VGTRK-nin jurnalisti Pavel Zarubinə müsahibəsində deyib.
“Yatmağa gedəndə hər yerdə işığı söndürürəm. Bu, uşaqlıqdan, valideynlərimdən qalan bir vərdişdir. Uşaqlıqdan gələn və daim mənimlə qalacaq bir şeydir”, – Putin vurğulayıb.
Prezident qeyd edib ki, valideynləri də hər gecə yatmazdan əvvəl evdəki bütün işıqları söndürürdülər.
Putin həmçinin 25 il əvvəl Rusiya prezidenti Boris Yeltsinlə söhbəti zamanı niyə rəhbər vəzifəni qəbul etməyə hazır olmadığını dediyini də izah edib. Onun sözlərinə görə, o zaman prezidentliyin onun üçün nə demək olduğunu düşünürmüş, lakin ilk növbədə ölkə qarşısında duran məsələlərin necə həll ediləcəyini götür-qoy edirmiş. Putin etiraf edib ki, prezidentlik vəzifəsinin öhdəsindən gələ bilib-gəlməyəcəyinə dair şübhələri olub.
Qeyd edək ki, Vladimir Putin 2000-ci il martın 26-da ilk dəfə Rusiya Federasiyasının prezidenti seçilib. 1999-cu il dekabrın 31-dən etibarən Boris Yeltsinin istefasından sonra dövlət başçısının səlahiyyətlərini icra edib. Hazırda Putin beşinci dəfədir ki, dövlət başçısı postunu tutur. 2008–2012-ci illərdə isə Rusiya hökumətinə rəhbərlik edib.
