Livan hökuməti "Hizbullah" hərəkatının silahsızlaşdırılması müqabilində İsrail ordusunun ölkə ərazisindən çıxarılması və atəşkəsə riayət olunacağı ilə bağlı zəmanət alıb.
Oxu.Az xəbər verir ki, bu barədə "The National" qəzeti mənbəyə istinadla məlumat verib.
Bildirilir ki, Livan ABŞ-nin əsas tələbini - ölkədəki bütün silahlı qüvvələrin dövlətin nəzarətinə verilməsini qəbul etməyə hazırdır. Lakin bu addım yalnız Qərbin zəmanətlərinə əməl olunduğu təqdirdə atılacaq.
"Bizim əsas prioritetimiz atəşkəsin təmin edilməsi və İsrail ordusunun çıxarılmasıdır", - deyə mənbə bildirib.
Qeyd olunur ki, İsrail qüvvələrinin Livandan çıxarılması və sülhün təminatçıları kimi ABŞ və Fransa çıxış edirlər. Eyni zamanda, "Hizbullah" da silahlarını təhvil verməyə hazır olduğunu bildirib.
ABŞ-nin Yaxın Şərq üzrə xüsusi nümayəndəsi Tom Barakın son Livan səfəri ilə bağlı mənbə qeyd edib ki, görüş gözləniləndən daha uğurlu keçib. Livan tərəfi ABŞ-nin təklifini dəstəkləyib, çünki bu, İsraillə münaqişəyə son qoymaq üçün imkan kimi qiymətləndirilib.
