NATO ilk növbədə Sovet İttifaqının mövcudluğunu dayandırdıqdan sonra ləğv edilməli idi, necə ki Varşava Müqaviləsi fəaliyyətini dayandırdı. Bu açıqlama ilə Rusiya xarici işlər naziri Sergey Lavrov çıxış edib. Onun sözlərinə görə, NATO təhlükəsizliyi gücləndirmək iqtidarında deyildi: “Daha doğrusu, alyans təhlükəsizliyin təmin edilməsinin faydalarını bölüşmək istəməyənlər tərəfindən manipulyasiya edildiyi üçün bunu edə bilmədi”.
Politoloq Tofiq Abbasov “Sherg.az”a söyləyib ki, Rusiyanın NATO ilə bağlı natahatlığı əbəs yerə deyil:
“Çünki birqütblü dünya yaradıldıqdan sonra Amerika Birləşmiş Ştatları və onun işlək aləti NATO-nun dünyada necə prosesləri gündəmə gətirdiyinin şahidi olduq. Amerika Birləşmiş Ştatları NATO-nun adından sui-istifadə edərək qanunsuz işlərə rəvac verirdi. Eyni zamanda özbaşına bir çox məsələləri həll etdikdən sonra guya Təhlükəsizlik Şurasının qətnamələrini gündəmə gətirirdi. Bunlar göstərir ki, Amerika faktiki olaraq Donald Trampa qədər NATO ilə vidalaşmaq niyyətində olmayıb. SSRİ-nin keçmiş Prezidenti Mixail Qorbaçovun dövründə Amerika danışıqlarda Varşava müqaviləsinin aradan götürülməsini və Sovet qoşunlarının Şərqi Avropadan çıxarılmasını tələb kimi ortaya qoydu. Buna qarşılıq isə NATO-nun yerindən tərbənməyəcəyini söylədilər. Lakin qısa müddət sonra Sovet İttifaqı qoşunları Şərqi Avropadan çıxarıldı, NATO yavaş-yavaş hərəkətə keçdi və Rusiyanın sərhədlərində yerləşdirildi. Ukrayna faciəsi belə göstərir ki, Amerika və onun Qərb dünyasından olan həmkarları həqiqətən də Rusiyanın narahatlığının səbəbsiz olmadığını nümayiş elətdirir. 2014-cü ildə Krım Rusiya tərəfindən işğal olundu. Həmin zaman NATO və Amerikanın məsələyə münasibəti nisbətən dözümlü oldu. Çünki NATO-nun Sevastopolda hərbi bazaları ələ keçirmək niyyətlərindən Rusiya Xarici Kəşfiyyat Xidmətinin xəbəri var idi. Sovet İttifaqı dövründən həmin hərbi bazaların yaradılmasına külli miqdarda vəsaitlər xərclənmişdi, buna görə də həmin yerləri Rusiya heç kəslə bölüşmək istəmirdi”.
Ekspert qeyd edib ki, Böyük Britaniya birmənalı mövqe tutaraq Rusiyanın maliyyəsindən qırtaraq Ukraynaya dəstək göstərəcəyini söyləyir:
“Yəni Qərb dünyası, xüsusilə də Böyük Britaniya, Almaniya, Niderland və Fransa müharibənin dayanmasını istəmirlər və Rusiyanın maksimum dərəcədə zəifləməsində maraqlıdırlar. Sözügedən proseslərdə ona görə də onların fikirləri haçalanır. Həmin ölkələr demokratiyanın qulluğunda olduqlarını, rəsmi Kreml isə onların Rusiyanın sonunu gətirməyə çalışdıqlarını vurğulayırlar. Belə olan halda getdikcə Rusiya zəifləyir və Ukrayna dərin borclar quyusuna düşür. Ukraynanın dünyaya gəlməyən yeni nəsilləri belə həmin borcların içində batacaqlar. Çünki Qərbin yaratdığı situasiya son dərəcə sürüşkəndir və Ukrayna xalqına heç bir imtiyaz vəd etmir. Amerika siyasəti ilə və Rusiya arasında antoqonizm mövcuddur. Sadəcə olaraü Tramp prezidentliyi dövründə savaşla bağlı nəsə edə bilər ki, ondan sonra hakimiyyətə kim gəlsə, vəziyyət eyni şəkildə davam edəcək”.
