Şimali Koreya bu həftə “Vonsan Kalma” adlı yeni istirahət mərkəzinə ilk rus turistlərini qəbul edib. Ancaq insan haqları təşkilatları burada tikinti zamanı işçilərin ağır şəraitdə və məcburi şəkildə işlədilməsini kəskin tənqid edir.
Sherg.az xəbər verir ki, lider Kim Çen In bu kurortu “dünya səviyyəli turizm və mədəniyyət mərkəzi” kimi təqdim etsə də, inşaat işləri ölkədə tam gizlilik şəraitində aparılıb. Uydu görüntüləri, daxili sənədlər və keçmiş rəsmilərin ifadələri bu layihənin qaranlıq tərəflərini ortaya çıxarıb.
Layihənin məqsədi bir milyon turist cəlb edərək bölgəni tədricən xaricə açmaq olub. Hətta 2017-ci ildə İspaniyaya nümayəndə heyəti göndərilərək turizm modelləri öyrənilib.
Ancaq ən ciddi ittihamlar “şok briqadaları” adlanan məcburi əmək dəstələrinə aiddir. BMT və şahidlərin sözlərinə görə, işçilər 24 saat fasiləsiz işlədilib, ağır şəraitdə və çox az maaşla məcburi işləməyə məruz qalıblar.
Pandemiyadan bəri xarici turistlərə qapalı olan Şimali Koreya, indi bu kurort vasitəsilə həm iqtisadiyyatı canlandırmaq, həm də Rusiya ilə yaxın münasibətləri gücləndirməyi planlaşdırır.
