ABŞ Prezidenti Donald Tramp gələn həftə Dövlət Departamentinin və ABŞ-nin Afrikadakı səfirliklərinin fəaliyyətinin azaldılmasına dair sərəncam imzalaya bilər.
Teleqraf xəbər verir ki, bu barədə “The New York Times” nəşri məlumat yayıb.
Məlumata görə, sözügedən sərəncam Dövlət Departamentinin radikal şəkildə yenidən strukturlaşdırılmasını nəzərdə tutur. Bu çərçivədə bir sıra Afrika ölkələrində ABŞ səfirliklərinin bağlanması planlaşdırılır.
Sənəddə həmçinin iqlim dəyişikliyi, miqrasiya və insan hüquqları məsələləri ilə məşğul olan bəzi büroların da ixtisar ediləcəyi qeyd olunur.
Ən ciddi dəyişikliklərdən biri isə Afrika ölkələrinə dair siyasəti həyata keçirən idarənin ləğv olunması olacaq. Onun yerini isə ABŞ-nin Afrika məsələləri üzrə xüsusi elçisinin ofisi tutacaq. Yeni struktur Ağ Evdəki Milli Təhlükəsizlik Şurasına tabe olacaq.
Qeyd edək ki, daha əvvəl “The Washington Post” nəşri Tramp administrasiyasının Dövlət Departamentinə ayrılan büdcəni iki dəfə, beynəlxalq təşkilatlara ayrılan maliyyəni isə 90 faiz azaltmağı planlaşdırdığını yazmışdı.
