“ABŞ Prezidenti Donald Trampın ölkədə əvvəllər qadağan olunmuş fikirlərini ifadə etdiyi üçün onun çoxlu bədxahları var”.
Teleqraf xəbər verir ki, bunu Rusiya Xarici İşlər Nazirliyinin sözçüsü Mariya Zaxarova ABŞ prezidentinin ölməsi ilə bağlı KİV-də yayılmış iddianı şərh edərkən deyib.
Diplomatdan Trampın iddia edilən ölümü ilə bağlı şayiələrin kimə lazım olduğu soruşulanda belə cavab verib:
“Düzünü desəm, bütün bunları izləyirdim. Düşünürəm ki, onun Amerika Birləşmiş Ştatlarında qadağan edilmiş şeyləri səsləndirdiyinə görə çoxlu sayda bədxahları var”.
Rusiya Xarici İşlər Nazirliyinin rəsmi nümayəndəsi qeyd edib ki, bu bədxahlar Trampa qarşı müxtəlif üsullardan istifadə edəcəklər: “Bunun arxasında kimin dayandığını bilmirəm”.
Zaxarova qeyd edib ki, bəziləri təkcə Trampın Ukrayna ilə bağlı mövqeyindən deyil, həm də bir çox başqa məsələlərdən narazıdır: “O, Amerika pasportlarında üçüncü cinsin təsbit edilməsi ilə bağlı dəhşətli macəranın ləğvinin qanunvericilik səviyyəsində qəbul edilməsini təmin etmək üçün hər şeyi etdi. O, Amerikada əsl söz azadlığını da qaytarmaq üçün hər şeyi edir”.
Rusiya rəsmisi Trampın Amerikanı xilas etmək üçün Ağ Evə qayıtdığını da iddia edib.
Qeyd edək ki, avqustun 29-da internetdə prezidentin iki gündür ictimaiyyət qarşısına çıxmaması ilə bağlı xəbərlər yayılmağa başlayıb. “Neewsweek” yazıb ki, “whereistrump” həştəqi X-də altıncı ən populyar həştəq olub. Süni intellekt “Grok” Amerika liderinin ehtimal edilən ölümü ilə bağlı 1,3 milyondan çox paylaşım qeydə alıb.
