“Biz orada olacaq hər hansısa bir qarşılığın yükünü ən çox üzərinə götürməli olan dövlətik. Bu baxımdan bir arzulayırıq ki, dinc yolla İranda müsbət istiqamətdə dəyişikliklər baş versin”
Yaxın gələcəkdə İran hakimiyyəti xalq tərəfindən devriləcək.
Bunu İsrailin kəşfiyyat naziri Gila Qamliel Londonda farsdilli media nümayəndələri ilə görüşü zamanı deyib.
“Hazırkı hakimiyyətin təsəvvür etdiyimizdən daha tez devriləcəyinə ürəkdən inanıram. İran xalqı artıq buna hazırdır və bu dəyişiklik xalqın əli ilə baş tutacaq. Gələcəkdə İsrail iranlıların ekoloji problemləri, su qıtlığı, kənd təsərrüfatı, yeni texnologiya çatışmazlığı, səhiyyə, hava çirkliliyi kimi problemlərinin aradan qaldırılmasına yardım edəcək”,- nazir bildirib.
“Əlbəttə, biz İsrail kəşfiyyatının kifayət qədər ciddi bir təsbitləri olduğunu bilirik. Ona görə də bu açıqlamaya olduqca ciddi yanaşılmalıdır”.
Bu sözləri mövzu ilə bağlı "Sherg.az"a açıqlamasında millət vəkili Fazil Mustafa səsləndirib:
“Bütövlükdə biz İranla bağlı məsələdə qonşu dövlət kimi orada hansısa qarşıqlığın tərəfdarı deyilik. Doğrudur, müsbət mənada müəyyən dəyişikliklərin olmasını biz də istəyirik. Demokratikləşmə, insan haqlarının qorunması, milli haqların insanlara verilməsi və digər məsələlər var ki, onların həll edilməsi zəruridir. Amma ümumilikdə İranda bu proseslərin hansısa bir xaotik məcrada getməsi bizim üçün olduqca təhlükəlidir. Biz orada olacaq hər hansısa bir qarşılığın yükünü ən çox üzərinə götürməli olan dövlətik. Bu baxımdan biz arzulayırıq ki, dinc yolla İranda müsbət istiqamətdə dəyişikliklər baş versin. Əlbəttə, bu çox kiçik bir ehtimaldır. Çünki inqilabla hakimiyyətə gəlmiş qüvvə o qədər vəhşiliklər törədir ki, gedəndə də inqilabla getməli olur. Bu baxımdan İranda hakimiyyət uğrunda ölümünə mübarizə gedir”.
