COP29-un sədri kimi Azərbaycan hesab edir ki, ölkələr qlobal miqyasda ən aktual olan iki məsələni - minalardan təmizləmə və iqlim dəyişikliyini birləşdirməlidir.
"Report" xəbər verir ki, Azərbaycan Prezidentinin Administrasiyasının Xarici siyasət məsələləri şöbəsinin müdir müavini, İdarələrarası Mərkəzin Katibliyinin rəhbəri Nüsrət Süleymanov Bakıda keçirilən III Beynəlxalq Minatəmizləmə Konfransının bağlanışında deyib.
“Humanitar minatəmizləmə sahəsində təcrübə toplayan və qazanmaqda davam edən ölkəm də oxşar problemlərin həllinə çalışır. Bu bilik və bacarıqların əldə olunması üçün maliyyə resursları lazımdır. Milliyyətindən asılı olmayaraq, demək olar ki, hər gün insanlar minalardan və partlayıcı qurğulardan ölür”, - o bildirib.
N.Süleymanovun fikrincə, minalar “ölüm toxumları”dır:
"Bu, ətraf mühit üçün ciddi təhlükədir. Dünyada çoxlu münaqişələr var. İndi birləşmək və müharibənin bütün aspektlərinə qarşı çıxmaq vaxtıdır. Minalar və partlayıcı qurğular onlardan ən məkrliləridir”.
O, minatəmizləmənin iqlim dəyişikliyi ilə mübarizəyə töhfə vermək üçün vacib aspekt olduğunu vurğulayıb: “Dünyada minalardan təmizləmə ilə bağlı müzakirələrin mövzusunu da dəyişdirmək lazımdır. Azərbaycan bu işi davam etdirmək əzmindədir”.
N.Süleymanov bildirib ki, konfransın bu iki gününün bütün iştirakçılar üçün faydalı olacağına ümid edir: “Bir-birimizdən müəyyən şeylər öyrəndik və bu problemin ciddiliyini müzakirə etmək imkanımız oldu. Əminəm ki, biz gələn il əldə etdiyimiz nailiyyətlərimizi müzakirə etmək, eləcə də planetimizi daha təhlükəsiz etmək üçün görüşəcəyik”.
