Yanvarın 8-də səhər saatlarında Şabran şəhəri Tofiq Abbasov adına 1 nömrəli tam orta ümumtəhsil məktəbinin 10-cu sinif şagirdi məktəbdənkənar ərazidə 11-ci sinif şagirdinə qarşı aralarında yaranmış mübahisə zamanı xəsarət yetirib.
Bu barədə APA-ya Quba-Xaçmaz Regional Təhsil İdarəsindən bildirilib.
Məlumata görə, xəsarət almış şagird tibb müəssisəsinə yerləşdirilib, hazırda müalicəsi davam etdirilir: "Məktəblinin fiziki və psixoloji durumu məktəb rəhbərliyi və idarə tərəfindən izlənilir. Qeyd olunanlarla yanaşı, stressin idarə olunması, sağlam psixoloji mühitin bərpasını təmin etmək üçün məktəb rəhbərliyinə şagirdlər və pedaqoji heyətlə maarifləndirici söhbətlərin aparılması tapşırılıb. Hadisə ilə bağlı hüquq-mühafizə orqanları tərəfindən araşdırma aparılır.
Bildiririk ki, məktəb yoldaşına xəsarət yetirən şagird bundan öncə də təhsil müəssisəsinin nizam-intizam qaydalarına uyğun olmayan davranışlar edib, məktəb rəhbərliyi və psixoloq tərəfindən həm şagirdlə, həm də ailəsi ilə mütəmadi olaraq profilaktiki söhbətlər aparılıb. Sözügedən son hadisədən sonra valideynin müraciəti və müvafiq ərizəsinə məktəbin pedaqoji şurasında baxılıb və şagird məktəb-şagird kontingentindən uzaqlaşdırılıb".
Qeyd edilib ki, Azərbaycan Respublikasının qanunvericiliyinə uyğun olaraq vətəndaşların icbari ümumi orta təhsil almaq hüququ təmin olunur.
***
12.52
Yanvarın 8-də saat 11:00 radələrində Şabran rayon sakini 17 yaşlı şəxs (kişi cinsli) baş, göz və əl nahiyələrində əzilmiş və cırılmış yaralar diaqnozu ilə Şabran Rayon Mərkəzi Xəstəxanasına hospitalizasiya edilib.
Bu barədə APA-ya TƏBİB-dən bildirilib.
Qeyd olunub ki, ona zəruri tibbi yardım göstərilib və ixtisaslı tibbi xidmət alması məqsədilə Bakı Elmi-Tədqiqat Göz Xəstəlikləri Klinikasına göndərişlə təmin olunub.
DİN-in Mətbuat Xidmətinin baş inspektoru, polis baş leytenantı Xəyal Talıbov APA-ya bildirib ki, məktəblilərin arasında baş verən münaqişə ilə bağlı hazırda Şabran Rayon Polis Şöbəsində araşdırma aparılır.
Qeyd edək ki, Şabranda 11-ci sinif şagirdinə onunla eyni məktəbdə təhsil alan 10-cu sinif şagirdinin xəsarət yetirdiyi bildirilir.
