Cənubi Qafqazda, xüsusilə Azərbaycan və Ermənistan arasında uzun illər davam edən gərginlik və münaqişələr, regionda sabitliyi təmin etmək üçün böyük əhəmiyyət kəsb edir. Son illərdə baş verən hadisələr, o cümlədən 2020-ci il İkinci Qarabağ müharibəsi və 2023-cü ilin antiterror əməliyyatı, bu iki dövlət arasındakı güc balansını əhəmiyyətli dərəcədə dəyişdi.
Lakin hazırda Ermənistanın yenidən silahlandırılması regiondakı sabitliyi təhdid edir.
Politoloq Elçin Abdullayev Sherg.az-a açıqlamasında Ermənistanın Azərbaycanla yenidən müharibəyə başlama ehtimalından, regional və beynəlxalq geosiyasi faktorlardan söz açıb:
"Hazırki vəziyyətdə Ermənistanın Azərbaycanla yenidən müharibəyə başlamasını real olaraq görmürəm. Əvvəla, ona görə ki, istər Azərbaycan rəsmləri, istərsə də Ermənistan rəsmləri, regionda sülh müqaviləsinin imzalanması və sabitliyin bərpa olunması istiqamətində bəyanatlar səsləndirirlər. Bu isə ondan xəbər verir ki, Ermənistan və Azərbaycan rəhbərliyi yenidən müharibə başlanmasının tərəfdarı deyillər. Hesab edirəm ki, 2020-ci il İkinci Qarabağ müharibəsi və 2023-cü il antiterror əməliyyatı bu iki dövlət arasında güc balansının tamamilə ortada olduğunu göstərdi. Belə ki, həm 2020-ci il, həm də 2023-cü il hərbi toqquşmalar təsdiqlədi ki, Ermənistanın hərbi potensialı Azərbaycanla uzun müddətli müharibəyə davam gətirə bilməyəcək. Bunu təbii olaraq Paşinyan hakimiyyəti və Ermənistan cəmiyyəti də çox gözəl bilir. Onlar gözəl anlayırlar ki, yenidən əgər Azərbaycanla müharibə həvəsinə düşsələr və yenidən müharibəyə başlasalar, o zaman Ermənistandan həm texnoloji baxımından, həm də canlı qüvvə baxımından güclü olan Azərbaycan ordusuna qarşı mütləq məğlub olacaqlar. Bu da o deməkdir ki, Ermənistan tərəfi Azərbaycanla müharibə riskini göz önünə almaz.
Təbii, burada Azərbaycanla Ermənistan arasındakı münasibətlərin sülh və yaxud da gərginlik səviyyəsində olması həm də beynəlxalq geosiyasi vəziyyətlə bağlıdır".
Ekspert Ermənistanın hərbi potensialını Rusiyanın və Qərbin verdiyi silahlar sayəsində artırdığını bildirib:
"Lakin hazırkı vəziyyətdə Rusiya-Ukrayna müharibəsinin gedişatı onu göstərir ki, Moskva bütün diqqətini Ukraynaya fokusladığı üçün Ermənistanın hərbi arsenalını silah-sursatla gücləndirmək iqtidarında deyil. Bundan başqa, bu da bir həqiqətdir ki, artıq Paşinyan hakimiyyəti Qərblə əməkdaşlığa və Avropa Birliyi ilə inteqrasiya siyasətinə üstünlük verir. Bu isə təbii olaraq Rusiyanın Ermənistana olan münasibətini gərginləşdirir. Beləliklə, Ermənistan daxilində antipaşinyan əhval-ruhiyyəsi ilə yaşayan Rusiya mənşəli qüvvələr var ki, onlar təbii olaraq müharibə istəyini tez-tez dilə gətirirlər. Lakin mən hesab etmirəm ki, Ermənistan daxilində olan Rusiya meyilli qüvvələr Moskva tərəfindən tam olaraq qızışdırılıb Azərbaycanla Ermənistanı yenidən müharibə meydanına gətirmək istəyirlər. Çünki bu gün Ermənistan nə qədər də Moskvadan uzaqlaşsa da və uzaqlaşmaq istəsə də, əslində, regionda yeni bir müharibənin başlaması zəif olan Rusiyanın istəyinə uyğun gəlmir.
Mən Ermənistanın yaxın dövrlərdə Azərbaycanla yeni müharibəyə başlaması ehtimalını çox aşağı görürəm".
Politoloq sonda Ermənistanın indiki hakimiyyətinin hər bir şəkildə öz mövqeyini qorumaq üçün Azərbaycanla sülh müqaviləsi imzalamağa çalışacağını vurğulayıb.
