İran prezidenti Bakıda dediklərini Ermənistanda təkrarlaya bilməz
İran Prezidenti Məsud Pezeşkianın İrəvana səfəri gözlənilir. Bu barədə Ermənistanın xarici işlər naziri Ararat Mirzoyan parlamentdə dövlət büdcəsinə dair hesabatın müzakirəsi zamanı bildirib. İran İslam Respublikası ilə münasibətlərin hazırkı səviyyəsindən danışan Ararat Mirzoyan bildirib ki, yüksək səviyyədə ikitərəfli qarşılıqlı səfərlər daim baş verir: "Biz Prezident Pezeşkianı İrəvanda gözləyirik".
Politoloq Elxan Şahinoğlu Sherg.az-a deyib ki, Məsud Pezeşkian Cənubi Qafqaz ölkələrindən ilk səfərini Azərbaycana edib. Ekspertə görə, bu, M.Pezeşkianın milli kimliyi baxımından təbii idi:
"Aydındır ki, İran prezidenti Bakıda söylədiklərinin eynisini İrəvanda söyləyə bilməyəcək. Azərbaycan dilində “Heydərbabaya salam” şeirini səsləndirməyəcək. Məsud Pezeşkian İrəvanda mehriban qonşuluqdan, iqtisadi əlaqələrin inkişafından danışacaq. Bütün hallarda Pezeşkianın Ermənistanın ünvanına söyləyəcəkləri Bakı ilə yanaşı, Təbriz və Ərdəbildə də diqqətlə izləniləcək".
