“Hazırda bu məsələ ilə bağlı heç bir müzakirə aparılmır”.
Teleqraf xəbər verir ki, bunu jurnalistlərlə söhbətində Ermənistanın ədliyyə naziri Srbuhi Qalyan parlamentin sədri Alen Simonyanın Konstitusiya dəyişikliklərində kilsə-dövlət münasibətlərinə yenidən baxıla biləcəyini istisna etmədiyi barədə bəyanatını şərh edərkən deyib.
“Heç nəyi istisna etmirəm, çünki səslənən hər bir fikir müzakirə oluna bilən ideyadır və onun ətrafında Konstitusiya Şurasında konsensus ola da, olmaya da bilər”, - nazir qeyd edib.
Erməni KİV bundan əvvəl Baş nazir Nikol Paşinyanın “Ermənistan Respublikası ilə Erməni Apostol Müqəddəs Kilsəsi arasında münasibətlər haqqında” Qanuna dəyişiklik edilməsi məsələsini müzakirəyə çıxarmaq istədiyi barədə məlumat yaymışdı. Sözügedən qanunla dövlət erməni kilsəsinin muxtariyyətini tanıyıb. Erməni mətbuatına görə, Nikol Paşinyan müvafiq qanuna dəyişikliyə nail olmaqla, erməni kilsəsinin dövlətdən muxtariyyətinə son qoymaq istəyir.
