155 faiz gömrük rüsumu tətbiq olunacaq
ABŞ Prezidenti Donald Tramp, Hindistanda qeyd edilən Divali bayramı münasibətilə Ağ Evdə hind icmasının nümayəndələri ilə görüşüb və gündəmə dair mühüm açıqlamalar verib.
Sherg.az xəbər verir ki, Çinə əlavə gömrük vergisi tətbiq olunub-olunmayacağı ilə bağlı suala cavab verən Tramp deyib:
“1 noyabrdan etibarən Çinə təxminən 155 faiz dərəcəsində gömrük rüsumu tətbiq olunacaq. Onlar üçün bunun davamlı olacağını düşünmürəm.”
Tramp əlavə edib ki, Çinə qarşı yumşaq davranmaq istəsə də, bu ölkənin uzun illər ABŞ-a qarşı çox sərt mövqe tutduğunu düşünür:
“Çünki bizdə iş sahəsində ağıllı olmayan prezidentlər olub. Bəziləri yaxşı siyasətçi idi, bəziləri isə heç siyasətçi də deyildi. Amma onlar Çin və digər ölkələrin bizdən faydalanmasına imkan verdilər.”
Tramp çıxışında Çin Prezidenti Si Cinpinlə görüş məsələsinə də toxunub.
O, əvvəlcə belə deyib:
“İki həftə ərzində Cənubi Koreyaya gedəcəyəm və orada Prezident Si ilə görüşəcəyəm. Bir çox məsələni müzakirə edəcəyik və bu danışıqlardan yaxşı nəticələr əldə edəcəyimizə inanıram.”
Lakin çıxışının davamında fikrini dəyişərək, görüşün bəlkə də baş tutmayacağını bildirib:
“Biz Çinlə ədalətli bir razılaşma əldə edəcəyik. Məncə, (Si ilə) çox uğurlu bir görüş olacaq. Bunu gözləyən çox insan var, amma bəlkə də bu baş verməyəcək. Bəlkə də görüş olmayacaq.”
Tramp, Si Cinpinlə münasibətlərinin yaxşı olduğunu vurğulayaraq qeyd edib:
“Onunla yaxşı bir razılaşma əldə edə biləcəyimi ümid edirəm, amma bu razılaşma ədalətli olmalıdır.”
Məlumata görə, ABŞ Prezidenti Donald Tramp ilə Çin Prezidenti Si Cinpin, 31 oktyabr - 1 noyabr tarixlərində Cənubi Koreyada keçiriləcək Asiya-Sakit Okean İqtisadi Əməkdaşlıq (APEC) Zirvəsi çərçivəsində bir araya gələcəklər.
