“Qazaxıstan görüşlər üçün sadəcə yer təşkil edir"
Azərbaycan və Ermənistanın xarici işlər nazirləri Ceyhun Bayramov və Ararat Mirzoyan Qazaxıstanda görüşəcək.
Ermənistan Xarici İşlər Nazirliyinin mətbuat katibi Ani Badalyan deyib.
Qazaxıstan Xarici İşlər Nazirliyinin rəsmi nümayəndəsi Aybek Smadiyarov isə deyib ki, Qazaxıstan hakimiyyəti Ermənistan və Azərbaycan xarici işlər nazirlərinin Almatıda görüşünü təşkil edərkən danışıqlarda vasitəçi rolunu oynamayacaq.
“Almatıda belə danışıqları planlaşdırırıq. İndi Azərbaycan və Ermənistandakı həmkarlarımızla əlaqə saxlayırıq. Qarşıdakı danışıqlar yalnız tərəflər arasında aparılacaq. Qeyd etmək istərdim ki, Astananın vasitəçiliyindən danışmırıq, biz yalnız xoşməramlı xidmətlər, “good offices” (yaxşı ofis) təqdim edirik”, - o bildirib.
Qeyd edək ki, Azərbaycan və Ermənistan XİN başçılarının Astanada görüşü gözlənilir.
Gözlənilən görüşü “Sherg.az”a dəyərləndirən sabiq xarici işlər naziri Elmar Məmmədyarov bildirib ki, XİN başçıları həmin görüşlə sülh sazişinə nail olmağın mümkün olub-olmadığını aydınlaşdırmağa çalışırlar:
“Qazaxıstan görüşlər üçün sadəcə yer təşkil edir. Onlar, Ermənistan və Azərbaycan XİN başçılarını Astanada qarşıladıqdan sonra təkbətək görüş üçün nazirləri tək qoyacaqlar. Qazaxıstan bizimlə dost və qonşu ölkədir. Demilitasiya və demkarkasiya komisiyasının danışıqları kimi, sülh məsələsi də Ermənistan-Azərbaycan sərhəddində danışıla bilər. Ümumiyyətlə, sülh danışıqları üçün birbaşa danışıqların aparılması məntiqi daha məqsədə uyğundur. Çünki danışıqlarda üçüncü ölkənin öz milli maraqları mövcuddur. Digər tərəfdən sülh sazişi ilk növbədə Ermənistana lazımdır. Ermənilər sülh sazişini imzalamaq istəyirlərsə, öz qanunvericiliklərini dəyişdirməlidirlər. Həmin konstitusiyada Qarabağ iddiası mövcuddur. Ona görə də sülh sazişi ilə Ermənistan qanunvericiliyinin dəyişdirilməsi eyni paketin içində həll olunmalıdır”.
