Noyabrın 4-də Türkiyə Respublikasının Vitse-prezidenti Fuat Oktayın Azərbaycana səfəri çərçivəsində Heydər Əliyev Mərkəzində Azərbaycanın İqtisadiyyat və Türkiyənin Ticarət nazirliklərinin dəstəyi, Azərbaycan Respublikasının İxracın və İnvestisiyaların Təşviqi Agentliyinin (AZPROMO) və Türkiyənin Xarici İqtisadi Əlaqələr Təşkilatının (DEİK) təşkilatçılığı ilə Azərbaycan-Türkiyə biznes forumu keçirilib.
Forumda Azərbaycanın Baş naziri Əli Əsədov və Türkiyənin Vitse-prezidenti Fuad Oktay ilə yanaşı iki ölkənin hökumət nümayəndələri və fərqli sahələrdə fəaliyyət göstərən sahibkarlar iştirak ediblər.
Biznes forumu çərçivəsində “Bridge” Şirkətlər Qrupu və Türkiyənin “Koloğlu” Holdingin tərkib hissəsi olan “KL Yapi” şirkəti ikitərəfli əməkdaşlıq memorandumu imzalayıb. Sənədi “Bridge” Şirkətlər Qrupunun direktoru Fərid İskəndərov və “KL Yapı Steel Construction & Trade Co.” adından Tamer Elçi imzalayıblar.
Memoranduma əsasən, şirkətlər inşaat və sənaye sahələrində uzunmüddətli təcrübələrindən istifadə edərək gələcək strateji əməkdaşlıq çərçivəsində atılacaq addımların ilkin təməlini qoyublar.
1998-ci ildən başlayaraq “Bridge” Şirkətlər Qrupuna daxil olan şirkətlər müxtəlif sahələrdə ixtisaslaşmaqla inşaat, mühəndislik, idarəetmə, otelçilik və restoran, kənd təsərrüfatı, treydinq və digər sahələrdə zəngin iş təcrübəsinə malikdirlər.
