Ermənistanda bir qrup vətəndaş parlamentin önündə etiraz aksiyası keçirir.
Etirazçıların sözlərinə görə, İkinci Qarabağ müharibəsindəki məğlubiyyətdən sonra Ermənistanın hərbi sənaye ilə bağlı dövlət siyasəti dəyişməyib.
Aksiya iştirakçıları bildirirlər ki, hökumət pulu məqsədyönlü istifadə etmir:
"Bu günlərdə ölkədə müxtəlif bayram tədbirləri keçirilir, müğənnilər dəvət olunur, bu müğənnilərin Ermənistana gətirilməsi üçün astronomik məbləğlər xərclənir, hərbi sənayenin inkişafına isə bir qəpik də ayrılmır. Burada biz hərbi sənayeyə “hə”, əylənməyə, tamaşa-əyləncəyə “yox” deyirik”.
Ermənistandakı etirazları şərh edən ehtiyatda olan polkovnik, hərbi ekspert Elxan Qəniyev "Sherg.az"a açıqlamasında bildirib ki, onlar yalan danışır, şou göstərirlər:
"Hindistan, Fransa və İrandan nə qədər silah-sursat alıblar. Elə Hindistanın özündən 24 milyon dollarlıq silah əldə ediblər. Bunlar özləri şou yaradırlar ki, guya, sənayeləri və texnikaları yoxdur. Gözdən pərdə asırlar. İkinci tərəfdən isə onlar gözlərini xaricdə yaşayan ermənilərə dikiblər. Çünki oradan pul gəlir. Onların sənayesi, fabriki, nefti, qazı, suyu heç nəyi yoxdur. 30 il ərzində bizim torpaqlarımızı istismar etdilər. Qarabağın Qızıl mədənlərindən pul götürürdülər. Onlar dilənçi günündədir. O cümlədən bunlar hamısı Paşinyana qarşı yaradılmış kampaniyadır. Yəni demək istəyirlər ki, Baş nazirləri vətəni, xalqı sevmir restoranlarda yeyib-içib, gəzir. Bütün pulu bu sadalananlara xərcləyir, başqa sənayeyə pul ayırmır və silah-sursat almır".
Şahanə Tağızadə
