"Makron və komandası ya ermənilərin qarşısında gözükölgəlidirlər, ya da onlara nəsə borcludurlar"
"Fransa Prezidentinin bu yaxınlarda Azərbaycanın beynəlxalq hüquqla problemləri olduğuna dair verdiyi bəyanat yalnız gülüş doğura bilər".
Bunu Azərbaycan Prezidenti İlham Əliyev oktyabrın 11-də MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 53-cü iclasının iştirakçılarını qəbul edərkən deyib.
Dövlət başçısı Fransadan danışanda, bu ölkənin rəhbərliyinin 2020-ci ilin bütün dövründən başlayan və indi də davam edən qeyri-konstruktiv və təxribatçı rolunu da qeyd edib:
"Azərbaycanın ünvanına çoxsaylı ittihamlar, əsassız təhdidlər və şantaj heç bir səmərə vermədi. Fransa Prezidentinin bu yaxınlarda Azərbaycanın beynəlxalq hüquqla problemləri olduğuna dair verdiyi bəyanat yalnız gülüş doğura bilər. Çünki Azərbaycan beynəlxalq hüququ pozmayıb. Biz öz ərazimizdə döyüşmüşük, separatizmi aradan qaldırmışıq, bütün humanitar normalara, Cenevrə Konvensiyasına əməl etmişik. Beynəlxalq hüququ isə 30 il ərzində Fransanın əlaltısı, bu gün onun əsas müttəfiqi olan Ermənistan başqa dövlətin ərazisini işğal edərək pozub. Necə deyərlər, öz gözündə tiri görməyib başqasının gözündə tük axtarmaq lazım deyil. Fransız rejimi milyon yarım əlcəzairlini təkcə əlcəzairli və müsəlman olduğuna görə məhv edib. Bu, soyqırımıdır. Hələ Fransanın Afrikada, Afrikanın digər hissələrində və bütün dünyada qanlı cinayətlərini demirəm. Fransanın bu gün müstəmləkələr saxlaması da ağlasığmazdır. Azərbaycan və şəxsən mənim tərəfimdən bu məsələ Qoşulmama Hərəkatının sədri kimi dəfələrlə Qoşulmama Hərəkatının sammitlərində qaldırılıb və qanlı müstəmləkə keçmişi olan və hətta bu gün bəzi Afrika ölkələrinin nə qədər səy göstərsələr də, xilas ola bilmədikləri bu ölkə bizi beynəlxalq hüququ pozmaqda ittiham edir. Bu, absurddur".
Prezidentin məlum çıxışını “Sherg.az”a şərh edən millət vəkili Rasim Musabəyov qeyd edib ki, rəsmi Paris Azərbaycana qarşı təzyiq təşkil etməyə çalışır:
"Fransa Azərbaycana nəsə diqtə etməyə gücü çatmadığı üçün ya Beynəlxalq Məhkəməyə soxularaq Ermənistanı ora yönəldir, ya İnsan Haqları ilə bağlı komissiyada bizə qarşı qətnamə qəbuluna qaldırır, ya da bizi "tənbeh" etmık üçün BMT Təhlükəsizlik Şurasını toplayır. Ancaq heç nəyə nail ola bilməyəcək. Etdiklərinin isə layiqincə cavabını alır. Ümumiyyətlə dəridən-qabıqdan çıxsa, belə Fransanı öz işlərimizə yaxın buraxmayacağıq".
Parlamentari əlavə edib ki, Makron və komandası ya ermənilərin qarşısında gözükölgəlidirlər, ya da onlara nəsə borcludurlar:
"Sanki rəsmi Paris Ermənistanın təzyiqi altındadır. Çünki Azərbaycana qarşı nəsə etmək üçün Paşinyandan çox dəridən-qabıqdan çıxırlar. Hər dəfəsində isə əlləri boş qalırlar".
