"Bütün dünyada nüfuzdan düşməyə başlayan Fransa bu günlərdə Nigeriyadan, Afrikadan da öz dərsini almaqdadır"
"Fransanın Ermənistan mövzusunda ölkəmizə qarşı qərəzli davranışları xristian təəssübkeşliyi və antitürk siyasətinin nəticəsidir". Bu barədə "Sherg.az"a Vəhdət Partiyasının sədr müavini, siyasi şərhçi Vasif Əfəndiyev deyib. Analitikin fikrincə, Fransa birmənalı olaraq ermənipərəst siyasət yürüdür: "Amma Fransanın xarici siyasətində xüsusi yer alan türkfobiya fiaskoya uğramağa məhkumdur. Türkiyə və Azərbaycanın bir-birinə daha çox yaxınlaşması, eyni zamanda Rusiya ilə balanslaşdırılmış siyasət yürütməsi Fransanın bizə yönəlik ədalətsiz fəaliyyətini neytrallaşdıracaq. Eyni zamanda Prezident Emmanuel Makronun Ermənistanla sülh müqaviləsinin bağlanmasını əngəlləmə cəhdləri Qarabağda erməni əsilli insanların bu siyasətdən bezməsi və birdəfəlik torpaqlarımızı tərk etməsi ilə nəticələnə bilər. Əlbəttə, belə arzuda olan ermənilərin təhlükəsiz gedişinə yardım ediləcəyi şübhəsizdir. Bir sözlə, Fransanın fəaliyyəti Qafqazda sülhün təmin olunmasına bir təhdiddir. Tədricən, bütün dünyada nüfuzdan düşməyə başlayan Fransa bu günlərdə Nigeriyadan, ümumiyyətlə, Afrikadan da öz dərsini almaqdadır".
