İrəvan Zəngəzur dəhlizinin ABŞ-nin nəzarətinə keçəcəyindən narahatdır.
"ABŞ Sünikdə 32 km yolu 100 il müddətinə icarəyə götürsə, nə olacaq".
Teleqraf xəbər verir ki, ABŞ-nin Türkiyədəki səfiri Tomas Barrak Ermənistanla Azərbaycan arasında uzanan mübahisədən danışıb.
O, Naxçıvana Azərbaycanın digər hissəsi ilə birləşdirən yuolun Amerikanın nəzarəti altında olacaq Sünik bölgəsindən keçməsini təklif edib.
Səfirin sözlərinə görə, söhbət on ildən artıqdır davam edən “münaqişə predmetinə çevrilmiş 32 kilometr”dən gedir.
Ermənistan mətbuatı T.Barrakı tənqid edərək, bildirir ki, səfir söhbətin Ermənistanın beynəlxalq səviyyədə tanınmış ərazisindən - Sünik bölgəsindən getməsi ilə bağlı heç bir qeyd-şərt qoymayıb ki, bu da əslində suverenliyin məhdudlaşdırılması deməkdir.
Erməni mətbuatı son bir ayda iki ölkə arasında dəhliz məsələsində ABŞ-nin iştirakı mövzusunun aktiv şəkildə gündəmə gətirildiyini qeyd edir.
Bir müddət əvvəl Ermənistan xarici işlər nazirinin müavini Mnatsakan Səfəryan Ermənistanın "dəhlizin beynəlxalq quruma həvalə edilməsinin" məqbul olduğunu bildirmişdi.
Bu gün isə Ermənistan baş nazirinin mətbuat katibi Nazeli Bağdasaryan ABŞ səfirinin bu versiyasını qeyri-məqbnul adlandırıb. O, bir daha dövlət qurumlarının standart cavabını təkrarlayıb: "Ermənistan regional infrastrukturların açılması məsələsini müstəsna olaraq Ermənistan Respublikasının suverenliyi, ərazi bütövlüyü və yurisdiksiyası kontekstində müzakirə edir. Ermənistan öz suveren ərazisinə nəzarətin heç bir üçüncü tərəfə verilməsini müzakirə etməyib və müzakirə etmir".
Türkiyə Prezidenti Rəcəb Tayyib Ərdoğan administrasiyasından isə bildiriblər ki, ABŞ səfirinin dediyi variantdan xəbərsizdirlər.
