“Üçrəngli dövlət bayrağımız tariximizin böyük bir dövrünü əhatə edir. Uzun illər boyu Azərbaycan xalqı bayrağımızın var olması, dalğalanması uğrunda böyük bir mübarizə aparıb”.
Bunu "sherg.az"-a Jurnalistika fakültəsinin professoru, tarixçi-alim Nəsiman Yaqublu “Bayraq Günü” -nün tarixi əhəmiyyətindən danışarkən deyib.
Professor bildirib ki, işğaldan azad olunmuş torpaqlarımızda bayrağımızın dalğalanmasını gördük də dövlətin vətandaşları olaraq qürur duyuruq:
“Xankəndində 8 noyabr" zəfər günü”-də şanlı bayrağımızın dalğalanması böyük tarixi hadisədir. Dövlət bayrağımız haqqında ilk qərar 1918- ci ildə Noyabrın 9- u verilib. Həmin günü mətbuat üzərində senzura ləğv edilib və azad mətbuatın mövcud olması haqqında qərar qəbul olunub. Bayrağımızın ilk dəfə rəsmi olaraq dalğalanması 1918- ci ilin Dekabrın 7 -si günündən başlanılıb. Parlamentin açılışı tarixi üçrəngli bayrağımız parlament binasının üzərinə qaldırıldı. Bayraq haqqında ilk şeir yazan isə görkəmli şair, Əhməd Cavad olub. Böyük dramaturq, Cəfər Cabbarlının, Əliabbas Müznib yazılarında bayrağımızı tərənnüm edən çox dəyərli şeirlərə, fikirlərə rast gəlmək mümkündür. Sovetlər birliyi dövründə bayrağın dalğalanması üçün cəhd göstərən şəxslər oldu. 1957- ci ildə "Qız qalası" üzərində bir neçə mücahid buna nail oldu. Ancaq həbs olunub, işgəncələrə məruz qaldılar. İlk növbədə mühacirətdə yaşamış, dövlət xadimi Məhəmməd Əmin Rəsulzadənin yazdığı kitablardan, nəşr etdirdiyi jurnallarda, qəzetlərdə şanlı bayrağımız haqqında daima məlumatlar verilirdi. Bu da bayrağımızın tarixini yaşadan ciddi mənbələrə çevrilirdi. Biz xoşbəxt millətik ki, müqəddəs bayrağımız azad olunmuş torpaqlarımız da dalğalanır".
