Artıq dörd ildir uğurla fəaliyyət göstərən bu dəhliz vasitəsilə 2024-cü ildə Azərbaycandan ümumilikdə 25 milyard kubmetrdən çox təbii qaz ixrac edilib. Bunun təxminən 13 milyard kubmetri AB ölkələrinə yönəldilib.
Sherg.az xəbər verir ki, bu bəyanat Cənub Qaz Dəhlizi Məşvərət Şurası nazirlərinin 11-ci iclası və Yaşıl Enerji Məşvərət Şurası nazirlərinin 3-cü iclasının yekunlarına dair keçirilən mətbuat konfransında səsləndirilib.
Energetika naziri Pərviz Şahbazov bildirib ki, bugünkü qlobal çağırışlar fonunda enerji təchizatının şaxələndirilməsi zəruridir.
"Təbii qaz enerji təhlükəsizliyinin əsas dayaqlarından biri olaraq qalır və bu sahəyə davamlı investisiyalar vacibdir. Eyni zamanda, yaşıl enerji interkonnektor layihələri Avropanın enerji təhlükəsizliyini gücləndirəcək və dayanıqlı enerjiyə keçidi sürətləndirəcək".
Avropa Komissiyasının üzvü Dan Jorgensen də qeyd edib ki, enerji təhlükəsizliyini artırmaq və Cənub-Şərqi Avropada təmiz enerjiyə keçidi dəstəkləmək məqsədilə tərəfdaşlarla birgə səylər davam etdirilir. O, tərəfdaş ölkələrin Cənub Qaz Dəhlizinin genişləndirilməsinə və yeni yaşıl enerji marşrutlarının yaradılmasına marağını qeyd edib.
