Rusiyanın Xarici İşlər naziri Sergey Lavrov bildirib ki, ABŞ Prezidenti Donald Tramp Ukrayna müharibəsini uzatmaq istəyən NATO və Avropa İttifaqı ölkələrinin təzyiqi altındadır. Lavrovun sözlərinə görə, Rusiyaya qarşı tətbiq olunan sanksiyalar əks təsir göstərərək, onları hazırlayanlara zərər verəcək.
Sherg.az xəbər verir ki, Çində Şanxay Əməkdaşlıq Təşkilatının Xarici İşlər Nazirləri görüşündə çıxış edən Lavrov, Trampın Ukrayna ilə 50 günə razılaşma əldə edilməzsə yeni sanksiyalar tətbiq olunacağı barədə bəyanatını şərh edib. O, bu müddətin arxasında hansı məqsədin dayandığını anlamaq istədiklərini deyib və ABŞ rəhbərliyinin Ukraynanı silahlandırmağa davam edən NATO və Aİ liderlərinin təzyiqinə məruz qaldığını bildirib.
Lavrov əlavə edib ki, Rusiyanın yeni sanksiyalarla mübarizə aparacaq gücü var və indiyədək görünməmiş sanksiyalara tab gətirib. Onun sözlərinə görə, bu sanksiyalar nəticədə Qərb ölkələrinin özlərinə ziyan vurur.
Nazir həmçinin qeyd edib ki, Rusiya və Ukrayna arasında dialoq üçün həmişə imkan var, amma Avropa ölkələri Ukraynanı danışıqlardan uzaqlaşdırır. O, İranın nüvə proqramı ilə bağlı da SCO ölkələrinin İranın dinc nüvə fəaliyyəti hüququnu dəstəklədiyini bildirib.
