Şimali Koreya dövlət televiziyasında yayımlanan yeni bir televiziya serialı, ölkədəki sistem problemləri və dövlətin uğursuzluqlarını ilk dəfə bu qədər açıq şəkildə ekranlara çıxarıb.
Sherg.az xəbər verir ki, “Paekhak ovalığında yeni bahar” adlı 22 seriyalı bu serial, hakim Koreya Əmək Partiyasının bir katibinin uzaq bir kənd bölgəsinə - Paekhak Ovalığına təyinatını mövzu alır.
Katib burada xaraba qalmış infrastruktur, pis planlaşdırma, qohumbazlıq, zəif iş əxlaqı və xalqın ehtiyaclarını nəzərə almayan rəhbərlərlə qarşılaşır.
Serialda kənd təsərrüfatı planlaşdırmasındakı çatışmazlıqlar, gənclərin kənd təsərrüfatı yerinə başqa işlərə yönəlməsi, məsul şəxslərin hesaba çəkilməməsi kimi mövzular açıq şəkildə göstərilir. Bu problemlərin gizlədilmədən, ətraflı formada göstərilməsi, Şimali Koreya kimi qapalı bir ölkə üçün olduqca diqqətçəkici sayılır.
Serial qəhrəmanları dövlət ideologiyasını birbaşa tənqid etməsələr də, tətbiqetmədəki nöqsanlara qarşı çıxırlar. Partiya katibi isə problemləri yuxarı rəhbərliyə yalnız rəsmi hesabatlarla çatdırmaq əvəzinə, xalqın arasında yaşayaraq sistemi içəridən müşahidə edib çatışmazlıqları üzə çıxarmağı üstün tutur.
Mütəxəssislərə görə, bu serial Şimali Koreya rəhbərliyinin sistem daxilində nəzarətli bir özünütənqid addımı ola bilər. Eyni zamanda, bu tip serialların ölkə daxilindəki gənc nəslə islahat yönümlü mesajlar vermə məqsədi güddüyü də ehtimal edilir.
Adətən, Şimali Koreyanın mədəni məhsulları tamamilə təbliğat məqsədi daşısa da, bu yeni serial, dövlətin bəzi sahələrdəki uğursuzluqlarını etiraf etməyə meyilli bir yanaşma sərgiləyir.
