Şimali Kipr, Türkiyə hərbçiləri və inşaatçılar BMT sülhməramlılarını itələyib çıxarıb
Şimali Kipr Türk Respublikasının (ŞKTR) təhlükəsizlik qüvvələri və adada yerləşdirilən BMT sülhməramlıları arasında gərginlik baş verib. Buna səbəb ŞKTR ərazisindən BMT sülhməramlılarının nəzarəti altında olan Yaşıl Xətt üzərindəki Pile kəndinə yolun çəkilməsi olub. BMT sülhməramlıları yolun çəkilməsinə əngəl olmağa çalışaraq, ərazidə beton bloklar yerləşdirib. Nəticədə, tərəflər arasında qarşıdurma yaranıb. ŞKTR-nin Xarici işlər naziri Tahsin Ertuğruloğlu vəziyyəti şərh edərək, yol inşası layihəsinin dayandırılmayacağını açıqlayıb. Türkiyə lideri Rəcəb Tayyib Ərdoğan da məsələyə münasibət bildirib. Ərdoğan deyib ki, bufer zonada olan BMT sülhməramlı qüvvələrinin nümayəndələrinin orada yaşayan yerli türklərə qarşı hərəkətləri qəbuledilməzdir və regionda gərginliyə səbəb olur: "Sülhməramlı qüvvələrin Şimali Kipr Türk Respublikasının sakinlərinə qarşı hərəkətləri bizim üçün qəbuledilməzdir. Təəssüf ki, onlar regionda gərginliyin artmasına səbəb olub, onların nə hüquqi, nə də humanitar əsasları var”.
Politoloq Turab Rzayev deyib ki, Şimali Kipr uzun müddətdir ki, BMT sülhməramlılarının nəzarət zonasında yerləşən Pilə kəndinə yol çəkmək istəyir: "Kəndə qədər məsafə cəmi 10 dəqiqəlik yol olsa da, BMT nəzarət-buraxılış məntəqəsindən keçərkən vaxt 1 saatdan da uzun çəkir. Kənd əhalisi köçməyə məcbur olurdu. İndi hökumət kəndə yeni birbaşa yol çəkir. Yolun çox kiçik hissəsi BMT nəzarət zolağına düşür. Buna baxmayaraq, BMT sülhməramlıları türklərin yol inşaatının önünü kəsmək üçün yola tikanlı məftillər, beton bloklar və avtomobillər yerləşdirib. Şimali Kipr, Türkiyə hərbçiləri və inşaatçılar isə qısa zaman kəsiyində BMT sülhməramlılarını itələyib çıxarıb, tikanlı məftilləri və BMT avtomobillərini isə inşaat texnikası ilə əzib kənara atıblar. Yəni yol çəkiləcək. Qarabağdakı Rusiya sülhməramlıları ilə bağlı maraqlı presedentdir".
