Yay aylarında insanlar sərinləmək, əylənmək üçün çimərliklərə üz tuturlar. Lakin sahilin kənarındakı tullantılar insanların narahatlığına səbəb olur. Tullantılar çimərlik mövsümündə ən böyük problemlərdən biridir. Bəzən insanlar dənizə gedərkən özləri ilə apardıqları əşyaları , yeməkləri , su qabların və.s sahilə atırlar. Bu da digər insanları narahat edir. Sahildə rahat gəzə bilmirlər.
Hüquqi və Demokratik İslahatlar Mərkəzinin sədr müavini, sosioloq Elçin Bayramlı “Sherg.az”a bildirib ki, dəniz kənarındakı tullantılar cəmiyyətin əbədi problemidir:
“Heç bir maariflənmə, izahetmə, qınama bu problemi həll etmir. Bu kimi problemlərin yalnız bir həll yolu var: ağır cəza və cərmilərdir. Əksər çimərliklərdə kameralar quraşdırılıb və nəzarətçilər var. Sahilə tullantı atan şəxslər ciddi şəkildə cəzalandırılmalı, cərimələnməli və ya ictimai işlərə cəlb olunmalıdırlar. Məsələn, həmin çimərlikdəki bütün zibilləri yığıb, daşıması təşkil olunmalıdır. Bu , ictimailəşərsə, digər insanlara da dərs olar ki, belə mədəniyyətsizliyin cəzası var. Cəza olmadığı təqdirdə cəmiyyətdə hər kəs öz istədiyini edəcək. İllərdir izah edirik ki, bu, insani hərəkət deyil. Lakin heç bir təsir göstərmir. Təbiətə atılan kimyəvi zibillər daha təhlükəlidir. Plastik butulkalar, salafan paketlər və.s belə tullantılar torpağa, suya zərərlidir”.
Sosioloq, dəniz kənarına tullantıların atılmaması üçün hansı addımları atmaq lazımdır - onlardan da danışıb:
“Cəmiyyət hər yerə özünün malı kimi baxsa, problemin qarşısı alınar. Əgər kimsə sahilə zibil atarsa, digəri onu görüb polisə xəbər verərsə, həmin adamnın cəzalanmasına nail olurlar. Hətta cəzalandırılan adamların sayı artdıqca bu, başqaları üçün çəkindirici vasitə olacaq. Azərbaycanda heç ictimai irad yoxdur. Buna görə də nəzarət gücləndiriməli, cəzalar atırılmalıdır ki, problem həll olunsun”.
Kəmalə Vəliyeva
