Parisdə qadın kriyoterapi seansı zamanı dünyasını dəyişib. O, azot sızması səbəbindən boğulub.
“Medicina” xəbər verir ki, hadisə Parisdə idman zalında baş verib.
Polisin məlumatına görə, On Air klubunun əməkdaşı olan iki qadın kriokamerada huşunu itirib. İlkin məlumata görə, otaqda həddindən artıq aşağı temperatur yaratmaq üçün istifadə edilən azot sızması olub. Qaz qoxusuz və rəngsizdir, lakin boğulmaya səbəb ola bilər.
Qeyd olunur ki, kriokamera bu yaxınlarda təmir olunub. İlk huşunu itirən 29 yaşlı idman zalının əməkdaşı olub. Hadisə zamanı kamerada 34 yaşlı müştəri də olub. Təcili yardım xidmətləri gələn zaman hər iki qurban ağır ürək-tənəffüs çatışmazlığı vəziyyətində idi. Prokurorluq bildirir ki, yarılma və toksikoloji ekspertiza qadının ölümünün dəqiq səbəbini müəyyən etməyə kömək edəcək.
İlkin tibbi yardım göstərmək istəyən 3 nəfər də xəstəxanaya yerləşdirilib. Ümumilikdə binadan 150-yə yaxın insan təxliyə edilib.
Kriyoterapiya Qərbdə peşəkar idmançılar və sağlam həyat tərzi həvəskarları tərəfindən təbliğ edilən məşhur gözəllik trendidir. Seanslar adətən iki ilə üç dəqiqə arasında davam edir və kamerada temperatur mənfi 110°C-ə düşə bilər. Bu temperaturun hormonların sərbəst buraxılmasına səbəb olduğu və qan dövranını artırdığı, əzələlərin bərpasını sürətləndirdiyi və iltihabı azaltdığı düşünülür.
Bununla belə, həkimlər xəbərdarlıq edirlər ki, belə bir prosedurun təsiri tam öyrənilməmişdir və hələ də onun faydalarına dair kifayət qədər elmi sübut yoxdur. Mütəxəssislər qeyd edirlər ki, kriokameranın təsiri adi buzun bədənə tətbiqi və ya soyuq suda çimmək ilə müqayisə oluna bilər.
2018-ci ildə Avropa Sənaye Qazları Assosiasiyası artıq kriyoterapiyada azotla bağlı risklər barədə xəbərdarlıq etmişdi. Və 2015-ci ildə oxşar hadisə Las-Veqasda baş verib: 24 yaşlı qadın spada tək qaldığı üçün kriokamerada öldü.
