Fəalların sözlərinə görə, "Başqa bir torpaq Yoxdur" sənədli filminin həmmüəllifi Həmdan Ballalın evi bazar ertəsi İsrailin işğal altında saxladığı Qərb sahilində məskunlaşanlar tərəfindən mühasirəyə alınıb və hücuma məruz qalıb.
Sherg.az xəbər verir ki, digər rejissor Yuval Avraam bildirib ki, Ballal əvvəlcə döyülüb, daha sonra təcili yardım maşınında olarkən İsrail əsgərləri tərəfindən saxlanılıb. İsrail ordusu isə təcili yardımdan heç kimin saxlanılmadığını açıqlayıb. Sonradan Ballalın sərbəst buraxıldığı bildirilib. İsrail ordusu üç fələstinli və bir israillinin təhlükəsizlik qüvvələrinə daş atmaq ittihamı ilə saxlanıldığını bəyan edib. Hadisə şahidlərinin sözlərinə görə, maskalı məskunlaşanlar Susiya kəndinə hücum edərək Ballalın evini mühasirəyə alıblar. Yəhudi hüquq müdafiəçiləri də hadisəni sənədləşdirmək üçün kəndə gedərkən hücuma məruz qalıb, maşınları zədələnib, özləri isə döyülüblər. Fəallar bildirir ki, israilli əsgərlər hücumu izləsələr də, yalnız avtomobilə hücum bitəndən sonra müdaxilə ediblər və məskunlaşanları təqib etməyiblər. İsrail ordusu isə əsgərlərin qarşıdurmanı dağıtmağa çalışdığını deyib. "Başqa bir torpaq yoxdur" filmi Masafer Yatta icmasının torpaq uğrunda mübarizəsini və iki rejissorun dostluğunu təsvir edir.
Qeyd edək ki, İsrail 1967-ci ildən Qərb sahilini işğal altında saxlayır. Beynəlxalq hüquqa görə, burada israilli məskunlaşmalar qanunsuzdur, lakin İsrail bunu qəbul etmir. 2023-cü ildə münaqişə başlayandan sonra məskunlaşanların fələstinlilərə hücumları artıb.
Mənbə: BBC News
